44-օրյա պատերազմը կանգնեցնելու ոչ մի հնարավորություն չի եղել: Այս մասին այսօր՝ նոյեմբերի 29-ին, 44-օրյ պատերազմի հանգամանքներն ուսումնասիրող ԱԺ քննիչ հանձնաժողովում փակ հանդիպումից հետո լրագրողների հետ զրույցում ասաց Լեռնային Ղարաբաղի Անվտանգության խորհրդի նախկին քարտուղար, պաշտպանության նախկին նախարար Սամվել Բաբայանը:
Դիտարկմանը, որ Արցախի նախկին դատախազը հայտարարել է, որ երկու անգամ դիմել են Նիկոլ Փաշինյանին, որպեսզի կանգնեցվի պատերազմը, առաջին անգամ դիմել է Արայիկ Հարությունյանը, Բակո Սահակյանն ու Արկադի Ղուկասյանը, երկրորդ անգամ Արցախի ԱԽ քաղաքական ուժերը, Սամվել Բաբայանն ասաց. «Մեր քաղաքական կուսակցությունը չի դիմել: Որեւէ նման դիմում չկա: Ես հասկանում եմ, որ պատերազմի ժամանակ ուժեղը թելադրում է իր կամքը: Ադրբեջանն ամեն անգամ իր պահանջն է դրել, որ մինչեւ Շուշի չհասնի, մինչեւ Շուշին չտան իրեն, ինքը չի կանգնեցնելու պատերազմը: Վերջ»: