Թուրքիայի իշխանությունները ինտերնետ-պրովայդերներին խնդրել են սահմանափակել մի քանի VPN-սերվիսների աշխատանքն ընտրություններից առաջ, հայտնել է Financial Times թերթը՝ հղում կատարելով այն փաստաթղթերին, որոնք հայտնվել են պարբերականի տրամադրության տակ։
Ըստ պարբերականի՝ օնլայն-կոնտենտի դեմ այդ միջոցները կիրառվում են տեղական ընտրություններին ընդառաջ, որոնք Թուրքիայում կայանալու են մարտին։
Պարբերականը, հղում կատարելով ստացած տվյալներին, նշել է, որ Թուրքիայի տեղեկատվական տեխնոլոգիաների եւ հաղորդակցությունների վարչությունը խնդրել է ինտերնետ-պրովայդերներին փակել 16 VPN-սերվիսների հասանելիությունը, ներառյալ TunnelBear-ը, Surfshark-ը եւ CyberGhost-ը։
Ինչպես պարբերականին հայտնել է թուրքական «Խոսքի ազատության ասոցիացիա» կազմակերպության (İFÖD) համահիմնադիր Յաման Աքդենիզը, քանի որ ինտերնետ-պրովայդերները պետք է հաշվետու լինեն իրենց աշխատանքի մասին, VPN-սերվիսների աշխատանքի սահմանափակման միջոցները դարձել են ավելի արդյունավետ, քան նախկինում։