![](img/news/80/22/03/default.jpg)
ԱՊՀ երկրները պետք է միասնական մոտեցում կիրառեն վտարման ենթակա անձանց հանդեպ։ Այս մասին Ազգային ժողովի նիստում, «ԱՊՀ մասնակից պետությունների միջեւ հարկադիր վտարման ենթակա անձանց վերադարձը վկայող փաստաթղթավորման հարցերի փոխգործակցության մասին» համաձայնագրի վավերացման քննարկման ժամանակ, հունվարի 15-ին ասել է ներքին գործերի փոխնախարար Արփինե Սարգսյանը։
Նպատակը համագործակցության արդյունավետ մեխանիզմների ստեղծումն է։
Փոխգործակցության կարգը կսահմանվի վկայականների ձեւակերպման մասով, որոնք նախատեսված են այն անձանց վերադարձի համար, որոնք ինքնությունը հաստատող գործող փաստաթղթեր չունեն եւ ենթակա են հարկադիր վտարման։
«Չնայած բանակցություններին մասնակցել են նաեւ ԱՊՀ այլ երկրներ, ներկայում այս համաձայնագիրը կիրառվում է միայն Ռուսաստանի եւ Բելառուսի կողմից։ Հայաստանը կդառնա երրորդ երկիրը, որը կվավերացնի համաձայնագիրը»,- նշել է Սարգսյանը։
Փաստաթուղթը, փոխնախարարի խոսքով, քննարկվել է ինչպես արդարադատության եւ ֆինանսների նախարարություններում, այնպես էլ Սահմանադրական դատարանում։ Բոլոր կառույցները դրական եզրակացություն են տվել։ Նշվել է, որ համաձայնագրի վավերացումը չի հակասի ՀՀ Սահմանադրությանը։
Հայաստանի մասով համաձայնագրում վերապահում կա. եթե համաձայնագրին Հայաստանից հետո միանա ԱՊՀ անդամ որեւէ այլ երկիր, ապա Երեւանը իրեն իրավունք կվերապահի դիտարկելու որեւէ լրացում մտցնելու հնարավորությունը։