Չինական Chouzhou Commercial Bank-ը հաճախորդներին տեղեկացրել է Ռուսաստանի հետ գործառնությունների դադարեցման մասին, տեղեկացրել է «Ведомости»-ն՝ հղում կատարելով երեք գործարարների, գործարար միավորումների եւ ֆինանսական խորհրդատուների։
Պարբերականի զրուցակիցները նշել են, որ բանկի մենեջերները անցած շաբաթ տեղեկացրել էին հաճախորդներին այն մասին, որ ֆինանսական կազմակերպությունը դադարեցնելու է հարաբերությունները ռուս կամ բելառուս ցանկացած անձի հետ։ Ընկերություններից մեկի սեփականատերը թերթին ասել է, որ բանկի որոշման պատճառով իր ընկերությունը մի քանի գործարք է ձախողել։
«Ведомости»-ն նշել է, որ հաշվարկների դադարեցման եւ չինական Նոր տարվա առիթով գրեթե անխուսափելի է լոգիստիկ կոլապսը. ապրանքը դուրս բերելը դժվար կլինի մինչեւ մարտ երկարատեւ հանգստյան օրերի պատճառով (փետրվարի 10-17-ը)։ Թերթը նշել է, որ Chouzhou-ն հիմնական բանկն է ռուսաստանցի ներդրողների համար համեմատաբար մեղմ կոմպլաենսի եւ հարմար աշխարհագրական դիրքի պատճառով։