Չեխիայի արդարադատության նախարար Պավել Բլաժեկը հրաման է ստորագրել հանրապետությունում կալանավորված քրեական հեղինակություն, Վրաստանի քաղաքացի Փոլադ Օմարովին ԱՄՆ արտահանձնելու մասին։ Այս մասին հայտնում է Novinky.cz պորտալը։
Օմարովի տեղափոխությունն ամերիկյան կողմին պետք է տեղի ունենա մոտ օրերս։ Նախարարն ուներ ընտրելու հնարավորություն, թե որ երկիր հանձնի կալանավորին. ԱՄՆ-ից բացի արտահանձնման համար դիմել էին նաև Վրաստանը և Ղազախստանը։ Միացյալ Նահանգներում երկու տարբեր դատարաններ էին նրա ձերբակալության օրդերը տվել. 2022 թվականի դեկտեմբերի 8-ին Նյու Յորքի Արևելյան շրջանի շրջանային դատարանը, իսկ հետո 2023 թվականի հունվարի 30-ին Նյու Յորքի հարավային շրջանի շրջանային դատարանը։ Նա մեղադրվում է փողերի լվացման, շորթման և ռեկետ կատարելու, սպառնալիքների և հրազեն պահելու մեջ։
Բացի այդ, ԱՄՆ-ում Օմարովին կասկածում են այնտեղ բնակվող իրանցի լրագրող, իրավապաշտպան Մասիհ Ալինեժադի սպանությունը նախապատրաստելու մեջ։ Քրեական հեղինակությանը ցմահ ազատազրկում է սպառնում։