Եթե մի օր մեր վերլուծությունները կամ համապատասխան կառույցների վերլուծությունները կբերեն նրան, որ ՀԱՊԿ-ից դուրս գալը Հայաստանի շահերից ավելի շատ է բխում, բնականաբար, պետությունը պետք է առաջնորդվի իր շահերով։ Այս մասին այսօր՝ փետրվարի 26-ին, լրագրողների հետ զրույցում ասաց ԱԺ «Քաղաքացիական պայմանագիր» խմբակցության պատգամավոր Բաբկեն Թունյանը։
Նրա խոսքով՝ եթե մենք մնում ենք այդ կառույցում, նշանակում է, որ դեռ իմաստ ենք գտնում այնտեղ մնալու։ Իշխանական պատգամավորը նշեց, որ այս պահին կառույցին ակտիվությունը սառեցված է, քանի որ գործողություններին հիմնականում չենք մասնակցում ու «ոչ թե Հայաստանն է հեռացել ՀԱՊԿ-ից, այլ ՀԱՊԿ-ն է հեռացել Հայաստանից»։
Իսկ ակտիվությունը սառեցնելու մասին հայտարարությունը, ըստ պատգամավորի, պահի տակ չի կատարվել, բնականաբար, հաշվարկներ կատարվել են։