Ժողովրդական լեզվով ասած՝ Հայաստանը Թուրքիայից ու Ադրբեջանից ավելի ուժեղ չէ։ Այդ մասին այսօր՝ փետրվարի 29-ին, ԱԺ-ում լրագրողների հետ ճեպազրույցում ասաց ԱԺ նախագահ Ալեն Սիմոնյանը։
«Մենք չենք կարող դիմակայել, առավել ևս, երբ դաշնակիցը, որ պետք է մեզ պաշտպաներ, լավագույն դեպքում մեզ չի պաշտպանել, եթե ոչ համատեղ ինչ-որ գործընթացի մեջ է, իսկ ես վստահ եմ, որ համատեղ ինչ-որ գործընթաց կա ու շատ վաղուց:
Ես վստահ եմ, որ Ուկրաինայի պատերազմը սկսվել է Լեռնային Ղարաբաղի պատերազմով։ Այստեղ պետք էր այլընտրանքային ճանապարհ ստանալ՝ խուսափելու հնարավոր պատժամիջոցներից, ինչը հիմա արվում է, օրինակ, ռուսական գազը հիմա Ադրբեջանը վաճառում է Եվրոպային իր խողովակներով, դա փաստ է, իմ հնարածը չէ»,- ընդգծեց նա։
Ալեն Սիմոնյանը չբացառեց, որ 2020-ի պատերազմը Ադրբեջանի եւ Ռուսաստանի պայմանավորվածությամբ է տեղի ունեցել. «Ես չեմ բացառում, որ այդպիսի պայմանավորվածություն է տեղի ունեցել, որովհետեւ երբ փաստերը համադրում ես, ամբողջը փոխկապված էր: Նույնիսկ կարող եմ ասել, որ Սիրիայից է սկսվել, ռուս-թուրքական բախումը Սիրիայում, երբ ինքնաթիռ խփեցին, հետո տեղափոխվեց մեր տարածաշրջան, փորձ արվեց էս տարծաշրջանում ապահովել ստաբիլություն, օղակ գցել երկու երկրների վզին՝ Հայաստանի ու Ադրբեջանի, բայց պլանները խախտվեցին: Թուրքիան ներս մտավ: Չեմ բացառում, որ Թուրքիայի եւ Ռուսաստանի միջեւ է եղել այդ պայմանավորվածությունը»,-ասաց նա:
