![](img/news/81/02/54/default.jpg)
Ռուսաստանի և Ուկրաինայի միջև հակամարտությանը խաղաղ լուծում գտնելու Թուրքիայի նախաձեռնությունները չեն իրականացվել աջակցության բացակայության պատճառով, դրանք, իրականում, սաբոտաժի են ենթարկվել: Այս մասին Անթալիայի դիվանագիտական ֆորումի պաշտոնական բացման ժամանակ հայտարարել է Թուրքիայի նախագահ Ռեջեփ Թայիփ Էրդողանը։
«Ուկրաինական ճգնաժամը թեւակոխել է իր երրորդ տարին։ Այստեղ՝ Անթալիայում, մեկնարկեց Ստամբուլի խաղաղության գործընթացը, հետո խաղաղության հասնելու հույսերը նոր մակարդակի հասան, բայց, ցավոք, անհրաժեշտ աջակցության բացակայության պատճառով մեր ջանքերն ապարդյուն անցան։ Խաղաղության հասնելու, ավերածություններից պաշտպանվելու և տասնյակ հազարավոր կյանքեր փրկելու պատմական հնարավորությունը, իրականում, բաց թողնվեց, ավելի ճիշտ՝ սաբոտաժ եղավ»,- ասել է Թուրքիայի ղեկավարը։
Նա ընդգծել է, որ Սիրիայում, Եմենում, Լիբիայում և Ուկրաինայում ճգնաժամերը ցույց տվեցին, որ ներկայիս միջազգային համակարգը լիովին անարդյունավետ է։
«Կանոնների վրա հիմնված այս համակարգի սնանկությունն առավել ակնհայտ է Գազայում: Այն, ինչը կատարվում է Գազայում, հաստատ պատերազմ չէ, դա ցեղասպանության փորձ է։ ՄԱԿ-ի Անվտանգության խորհուրդը և միջազգային կազմակերպությունները քայլեր չեն ձեռնարկել արյունահեղությունը դադարեցնելու համար»,- ասել է Էրդողանը։