Մենք խորապես անհանգստացած ենք այն տեղեկություններով, որ ադրբեջանական ոստիկանությունը ստուգումներ է կատարել Toplum TV անկախ ԶԼՄ-ի աշխատասենյակում, ինչպես նաեւ բազմաթիվ անկախ լրագրողների եւ քաղաքացիական հասարակության ակտիվիստների ձերբակալությունների մասին տեղեկություններով։ Այս մասին ճեպազրույցում հայտնել է ԱՄՆ պետդեպարտամենտի պաշտոնական ներկայացուցիչ Մեթյու Միլլերը։
«Մենք պետք է մեր վճռական անհամաձայնությունը հայտնենք լրագրողներին, քաղաքացիական հասարակության ներկայացուցիչներին եւ ընդդիմադիր գործիչներին վախեցնելու շարունակվող փորձերին, բռնաճնշումներին եւ պատիժներին։ Մենք կոչ ենք անում Ադրբեջանին դադարեցնել նրանց հետապնդումները, ովքեր իրականացնում են իրենց հիմնական ազատությունները, եւ պահանջում ենք ազատել այն անձանց, ովքեր անարդարացիորեն պահվում են քաղաքական գործերով։ Ոչ ոք չպետք է բանտարկվի կամ այլ պատժի արժանանա կարծիքի ազատ արտահայտման համար»,- ասել է Միլլերը։
Նա նաեւ պատասխանել է լրագրողի այն հարցին, թե ինչու պետք է Ադրբեջանի իշխանություններն այլ հետեւություն անեն Abzas TV-ի եւ լրագրողների նախորդ ձերբակալությունների հետ կապված։
«Ես կարծում եմ, որ նրանք պետք է այլ եզրակացություն անեն, ուստի չեմ խոսի այն մասին, որ նրանք պետք է այլ եզրակացություն անեն։ Միայն կասեմ, որ նրանք պետք է դադարեցնեն այդ գործողությունները, որովհետեւ դա բխում է նրանց սեփական ժողովրդի շահերից։ Մենք կշարունակենք բացատրել դա։ Եվ ես կարող եմ հավաստիացնել, որ երբ մենք մասնավոր դիվանագիտական զրույցներ ենք ունենում ադրբեջանցի պաշտոնյաների հետ, ինչպես անցած ամիս նախարարի հետ, մենք խոսում ենք մասնավոր կարգով»,- նշել է ԱՄՆ պետդեպարտամենտի պաշտոնական ներկայացուցիչը։
