Չնայած պատժամիջոցներին՝ բրիտանական արտադրության թանկարժեք մեքենաները շարունակում են հայտնվել Ռուսաստանում երրորդ երկրներով, որոնցից մեկն էլ Ադրբեջանն է, գրել է Sky News-ը։

Լրագրողները նշել են, որ պատժամիջոցներից հետո էլ էլիտար բրիտանական մեքենաները ներկրվում են Ռուսաստան շրջանցող ճանապարհներով, երրորդ երկրների միջնորդների միջոցով։

2023թ. բրիտանական մեքենաների արտահանում Ադրբեջանում ավելացել է մոտ 2000 տոկոսով մինչեւ պատերազմը հնգամյա ժամանակամիջոցի համեմատ, ինչն աննախադեպ աճ է։

Երկիրն անսպասելիորեն դարձել է Բրիտանիայից մեքենաների 16-րդ խոշոր ներմուծողը՝ առաջ անցնելով Ավստրիայից, Պորտուգալիայից եւ Շվեդիայից։

Դա քանակապես համապատասխանում է Ռուսաստան բրիտանական մեքենաների ամենամյա արտահանմանը նախքան պատժամիջոցները։ Միաժամանակ նկատվել է նաեւ Ադրբեջանից Ռուսաստան մեքենաների արտահանման աննախադեպ աճ։

HMRC-ի տվյալներով՝ բրիտանաան մեքենաների միջին արժեքը, որոնք արտահանվում են Ադրբեջան, կազմում է ավելի քան 100 հազար ֆունտ, այսինքն՝ խոսքն էլիտար մեքենաների մասին է։

Լրագրողների աղբյուրներն ասում են, որ գերմանական մեքենաները Ռուսաստանում հայտնվում են գերազանցապես Ղրղզստանից, բրիտանականները՝ Ադրբեջանից։

Մեքենա արտադրողները հավաստիացնում են, որ իրենց ապրանքը չեն վաճառում Ռուսաստանում։ Փաստացի գրեթե անհնար է պարզել վերջնական գնորդին եւ հետեւել ապրանքին այն բանից հետո, երբ այն, պայմանականորեն, հայտնվել է Ադրբեջանում։