Եվրահանձնաժողովը պաշտոնական հաղորդագրություն է հրապարակել ԵՄ ընդլայնման և Եվրամիությանն անհրաժեշտ ներքին բարեփոխումների վերաբերյալ, որում, ի թիվս այլ բաների, առաջարկվում է նոր անդամների աստիճանական ինտեգրումը համայնքին նույնիսկ նրանց անդամակցությունից առաջ: Այս մասին հայտնում են Եվրահանձնաժողովի մամուլի ծառայությունից։
Այս հաղորդագրությունն առաջին քայլն է ԵՄ-ի անխուսափելի բարեփոխումների ճանապարհին, որպեսզի այն նախապատրաստեն ընդլայնմանը, ասել է հանձնաժողովը: Փաստաթուղթը ուսումնասիրում է ԵՄ ընդլայնման հետևանքները չորս հիմնական ոլորտներում՝ արժեքներ, քաղաքականություն, բյուջե և կառավարում, և հիմք է ստեղծում ԵՄ ներքին գործերի բարեփոխումների համար՝ նախքան ընդլայնումը:
Փաստաթղթում հանձնաժողովը պնդում է, որ անդամակցության ձգտող պետությունները պետք է լավ պատրաստված լինեն, իսկ անդամակցության գործընթացը պետք է մնա արժանիքների վրա հիմնված:
Հանձնաժողովը հանդես է եկել թեկնածու երկրների աստիճանական ինտեգրման օգտին ԵՄ-ին նրանց անդամակցությունից շատ առաջ: Ընդլայնման գործընթացը «թեկնածու և պոտենցիալ թեկնածու երկրներին կառաջարկի «առաջադեմ ինտեգրման» ընդլայնված հնարավորություններ... ԵՄ ընտրված քաղաքականություններում նույնիսկ նրանց անդամակցությունից առաջ՝ նրանց տրամադրելով որոշակի առավելություններ և պարտավորություններ՝ կապված ԵՄ անդամակցության հետ», - ասվում է փաստաթղթում:
Հանձնաժողովն ընդգծում է, որ լիիրավ անդամակցությունը կպահանջի «լիարժեք համապատասխանություն իրավունքների և պարտականությունների միասնական համապարփակ փաթեթին»:
