Արդեն առաջիկա օրերին Գերմանիան առաջին փուլում Ուկրաինային կտա 10 հազար հրետանային արկեր բունդեսվերի զինանոցներից։ Այս մասին DW-ի բացառիկ հարցազրույցում ասել է Գերմանիայի ՊՆ-ում Ուկրաինայի գծով իրավիճակային կենտրոնի ղեկավար, գեներալ-մայոր Քրիստիան Ֆրոյդինգը։ Բեռլինում, նրա խոսքով, որոշվել է իրականացնել զինամթերքների մատակարարումը երեք փուլով, տեղեկացրել է DW-ն։
Երկրորդ փուլում, միջնաժամկետ հեռանկարում Գերմանիան որոշել է աջակցել չեխական նախաձեռնությանը եւ իր վրա վերցնել 180 հազար արկեր գնելու ծախսերը, որոնք կհանձնվեն Կիեւին ընթացիկ տարվա երկրորդ կեսին։
Իսկ երկարաժամկետ հեռանկարում, ի լրացումն Չեխիայի պլանի, Գերմանիան երկկողմ համաձայնագիր է կնքել Ուկրաինային, սկսած չորրորդ եռամսյակից, եւս 100 հազար արկեր հանձնելու մասին։ Թե որ երկրի հետ է կնքվել այդ համաձայնագիրը՝ Քրիստիան Ֆրոյդինգը չի ցանկացել նշել։
Խոսելով այն մասին, թե ավելի շատ ինչի կարիք ունի Ուկրաինան ներկա պահին՝ ռուսական ագրեսիան հաջող հետ մղելու համար, նա նշել է «հրետանային արկերը, զինամթերքները եւ հրթիռները ՀՕՊ ժամանակակից համակարգերի համար, ինչպես նաեւ զրահապատ մարտական մեքենաները»։