![](img/news/81/70/29/default.jpg)
Երբ խոսում եք ԵԱՀԿ Մինսկի խմբի մասին, ես էլի ձեզ կոչ եմ անում՝ գնացե՛ք, վերցրե՛ք, նայե՛ք ԵԱՀԿ-ի 1996 թվականի դեկտեմբերի լիսաբոնյան գագաթնաժողովը, որտեղ ասվում է, որ ԼՂ-ի ինքնորոշման իրավունքը պետք է պաշտպանվի, և ԼՂ-ն պետք է ստանա ինքնավար կարգավիճակ Ադրբեջանի կազմում: Այս մասին այսօր՝ ապրիլի 10-ին, կառավարության ծրագրի 2023 թվականի կատարողականի քննարկման ժամանակ իր ելույթում նշեց ՀՀ վարչապետ Նիկոլ Փաշինյանը՝ անդրադառնալով «Հայաստան» խմբակցության ղեկավար Սեյրան Օհանյանի հայտարարությանը, թե ԵԱՀԿ Մինսկի խումբը ընդունում էր, որ ԼՂ հարցը պետք է լուծվի ինքնորոշման իրավունքի հիման վրա:
«Այս ֆորմուլան է, որ մեր քաղաքական վերնախավը երկար ժամանակ թաքցրել է Հայաստանի ժողովրդից: Այն ժամանակ ինտերնետ չի եղել, որ որոշումից կես ժամ հետո բոլորն իմանային: Ինչո՞ւ եք ժխտում այս իրողությունը»,-ասաց Փաշինյանը:
Փաշինյանը նաեւ հիշեցրեց, թե ինչ պայմաններում է ընդունվել Արցախի իշխանությունների կողմից ԼՂՀ-ն լուծարելու որոշումը. «Եղել է հնարավորություն՝ եվրոպական հարթակներում մեկնարկել խոսակցություն Ադրբեջանի հետ: Ինչո՞ւ չի գնացել ԼՂ-ն: Գիտե՞ք՝ ինչու չի գնացել, որովհետև արգելել են ԼՂ-ին, արգելել են, և դա ես չեմ եղել, ես չէի կարող, ուզենայի էլ, չէի կարող: Ար-գե-լել են…
Ես համաձայն եմ ձեր այն դիտարկման հետ, որ ասացիք (կներեք, եթե շատ ճշգրիտ չմեջբերեմ)՝ միայն հիմար մարդը կարող է ուրախանալ: Իհարկե, միայն հիմար մարդը կարող է ուրախանալ առնվազն հայաստանյան հատվածում: Այո՛, որոշ հիմար մարդիկ իրենց ձեռքերը լվացել են, և ես դա եմ ասում»,- ասաց նա: