Ծրագրում գրել եք մի բան և ներկայացնում եք այստեղ ճիշտ հակառակը. Խոսում էիք Արցախի ինքնորոշման իրավունքի պաշտպանության ու անվտանգության ապահովման մասին, բայց այլ արդյունքների ու հետևանքների մասին եք խոսում: Այս մասին, այսօր՝ ապրիլի 10-ին, ԱԺ-ում, դիմելով վարչապետ Նիկոլ Փաշինյանին ասաց «Հայաստան» խմբակցության քարտուղար Արծվիկ Մինասյանը։
«Որպես ժողովրդավարության բաստիոն հռչակած երկրի լուծումը ո՞րն է՝ հրաժարական, հեռացում, ընտրություններ և նոր կառավարություն, որովհետև եթե ծրագիրը փոխվել է, ամրագրված մոտեցումները չկան, ապա չի կարող այդպիսի կառավարությունը լինել լեգիտիմ: Ձեր իշխանություն պահելու ձգտումը թույլ չի տալիս, որպեսզի այս քայլին գնաք և ի վերջո տարածքների վերաբերյալ պահանջվո՞ւմ է հանրաքվեով լուծում, թե՞ ոչ», - նշեց նա։
Պատասխանելով հարցին՝ Փաշինյանն ասաց․ «Ճիշտ եք ասում, մեր ծրագրում գրված է Լեռնային Ղարաբաղի ժողովրդի ինքնորշման իրավունք, ես եկել ասել եմ՝ ժողովուրդ, Լեռնային Ղարաբաղի ինքնորաշման իրավունքը, եկեք առնչվենք, այն չէ, ինչը, որ մենք նկատի ենք ունեցել, որովհետև ինքնորշում բառը, ցավոք, այն քիչ բաներից է, որը հայերը չեն ստեղծել, և նրանք ովքեր ստեղծել են «ինքնորոշում» բառը և եզրույթը, ասում են՝ այո ԼՂ-ն ունի ինքնորոշման իրավունք, ԼՂ-ի ժողովրդի ինքնորոշման իրավունքը պետք է պաշտպանվի, և ԼՂ-ն Ադրբեջանի կազմում պետք է ունենա ինքնավար կարգավիճակ: 1996-98թթ պրոցեսներով Հայաստանում իշխանությունը զավթելու և պահելու համար ներկայացվել է այլ լույսի ներքո և տրվել որոշ տեղերից ստացված հավաստիացումներ, որ ամենը կլուծենք»։
Անդրադառնալով հրաժարականին՝ Փաշինյանն ասաց, որ 2 անգամ արդեն հրաժարական է տվել: Նրա խոսքով՝ ԼՂ-ի ինքնորոշման իրավունքն այն չէ, ինչ իրենք նկատի են ունեցել, որովհետև «ինքնորոշում» բառը, ցավոք, հայերը չեն ստեղծել:
«Երբ ես ասել եմ, որ նշաձողը պետք է իջեցնենք, ես նախընտրական ծրագրի հետևից եմ գնացել: Գիտե՞ք՝ ինչու է ԼՂ-ն հայաթափվել, հենց այդ ճշմարտությամբ, որ ԼՂ-ն պետք է ունենար ինքնավար կարգավիճակ Ադրբեջանի կազմում և կառավարվեր երկու սուբյեկտի կողմից՝ ԼՂ-ի հայերի և ադրբեջանցիների: Սա է եղել բանակցությունների այն անշրջելի կետը, որը ես 2018թ-ին ստացել եմ ժառանգություն»,- նշեց նա:
