Հարավային Օսիայի նախագահի նախկին թեկնածու Ալլա Ջիոեւան հայտարարել է, թե առայժմ չի կարողացել պայմանավորվածության հանգել հանրապետության իրավիճակի մասին, եւ բանակցությունները շարունակվելու են ուրբաթ օրը:
Հիշեցնենք, որ այսօր Ջիոեւան Հարավային Օսիայի ղեկավարությանը վերջնական ժամկետ էր տվել ավելի վաղ ներկայացրած պահանջները կատարելու համար: Նրա վերջնագրի ժամկետը ավարտվել է, եւ այսօր բանակցությունները որեւէ արդյունք չեն տվել: Ջիոեւայի խոսքով, ստեղծված ճգնաժամից դուրս գալու ելքերի մասին խոսելը դեռ վաղ է, հաղորդում է «ՌԻԱ Նովոստին»:
Նշենք, որ Ջիոեւան եւ նրա կողմնակիցները պահանջում են չեղյալ հայտարարել Գերագույն դատարանի վճիռը, որով նախագահական ընտրությունների արդյունքները ճանաչվում էին առ ոչինչ: Չկատարելու դեպքում Ջիոեւան հետագա գործողությունների ողջ պատասխանատվությունը բարդել էր հանրապետության ղեկավարության վրա: Ջիոեւայի կողմնակիցներն արդեն բողոքի ակցիային են պատրաստվում Ցխինվալի կենտրոնական հրապարակում: