Բաքուն եւ Անկարան գիտակցում են Իրանի ադրբեջանցիների ազդեցությունը Ղարաբաղի հարցի վրա: Նման կարծիք NEWS.am-ի թղթակցի հետ զրույցում հայտնել է Մերձավոր Արեւելքի եւ Պարսից ծոցի ռազմական վերլուծության ինստիտուտի (INEGMA) փորձագետ Թեոդոր Կարասիկը` մեկնաբանելով Իրանի ադրբեջանցիների վերջին ցույցերը:
Մի քանի օր առաջ Իրանում ադրբեջանական բնակչության ներկայացուցիչները Արեւելյան Ադրբեջան նահանգի մայրաքաղաք Թավրիզի ֆուտբոլային մարզադաշտերում ցույցերի նոր ալիք էին բարձրացրել: Տեղի ֆուտբոլային թիմի եւ Շիրազի ակումբներից մեկի խաղի ընթացքում երկրպագուները թուրքական եւ ադրբեջանական դրոշներով վերնաշապիկներ են հագել եւ տրիբունայում ադրբեջանական դրոշ ծածանել:
Կրասիկի կարծիքով, դժվար է եզրակացնել` ցույցերը նախապես ծրագրված էին, թե` ոչ: «Չի կարելի այդ մասին համոզված խոսել, որովհետեւ հենց երկրպագուների շարքերում պահանջները խիստ տարբեր են», – ասել է փորձագետը:
«Թեհրանը ղարաբաղյան գործընթացում օտար ուժ չէ եւ իր խաղադրույքը շատ զգույշ է կատարում` Կովկասում ձեւավորելով իր դիրքորոշումը: Գործընթացի մնացած մասնակիցները, ներառյալ Ռուսաստանը եւ Հայաստանը, գիտակցում են խաղադրույքները եւ խաղարկում հնարավոր սցենարները», – հավելել է Կարասիկը:
Նշենք, որ Իրանում էթնիկ ադրբեջանցիների թիվը, որոնք հիմնականում բնակեցված են Արեւելյան եւ Արեւմտյան Ադրբեջան նահանգներում, տարբեր գնահատականներով, հասնում է 15-20 միլիոնի:
