Հայաստանը մյուսներից շուտ կարող է հաղթահարել ֆինանսական ճգնաժամի հետեւանքները եւ վերականգնել իր տնտեսությունը: Այդ մասին Ազգային ժողովի ամբիոնից հայտարարել է ֆինանսների նախարար Տիգրան Դավթյանը:
Նրա խոսքով, Հայաստանը մյուսներից ուշ իր մաշկին զգաց ճգնաժամի հետեւանքները եւ մյուսներից շուտ կարող է հաղթահարել դրանք՝ չնայած, որ տնտեսական անկման ցուցանիշը ամենաբարձրներից է: «Սակայն տնտեսական անկման ցուցանիշը միայն տեխնիկական ցուցանիշ է՝ որն արտացոլում է միայն երկրի իրավիճակի տեխնիկական կողմը»,- հայտարարել է նախարարը՝ եւ հավելել, թե ընթացիկ տարում աշխատավարձերը Հայաստանում աճել են երկնիշ ցուցանիշով:
Նշենք, որ այսօր երեկոյան կայանալու է ԱԺ արտահերթ նիստ՝ 2010թ. պետական բյուջեի նախագծի քննարկումն ավարտելու նպատակով: Փաստաթղթի քվեարկությունը կայանալու է չորս օրից, խորհրդարանի արտահերթ նստաշրջանի ընթացքում: