Հայ ազգային կոնգրեսի պետաիրավական հանձնախումբը դեռեւս նախորդ տարվա նոյեմբերին արձագանքել էր «Արտակարգ դրության իրավական ռեժիմի մասին» օրենքի հակասահմանադրական լինելուն եւ ծավալուն տեղեկանք հրապարակել: Այս մասին, այսօր` մարտի 23-ին, լրագրողների հետ հանդիպման ժամանակ հիշեցրեց ՀԱԿ-ի իրավական հանձնաժողովի համակարգող Գագիկ Ջհանգիրյանը, խոսելով հիշյալ օրինագծի մասին, որն ԱԺ-ում ընդունվեց երեք օր առաջ:
Նրա խոսքով, ՀՀ զինված ուժերի խնդիրը Հայաստանի եւ նրա անվտանգության պաշտպանությունն է արտաքին ոտնձգություններից: Ինչ վերաբերում է ռազմական դրությանը, ապա, ըստ Ջհանգիրյանի, նախագահը զինված ուժերի գործադրման լիազորություն ունի միմիայն Հայաստանի վրա զինված հարձակման, այդպիսի հարձակման անմիջական վտանգի եւ պատերազմ դեպքում: Իսկ ներկայիս օրենքը, Գագիկ Ջհանգիրյանի փոխանցմամբ, ի սկզբանե հակասահմանադրական է, հատկապես 9-րդ հոդվածը, որտեղ վկայակոչումներ կան ՊՆ-ի միջոցների օգտագործման մասին:
Ջհանգիրյանը հիշեցրեց, որ 2008-ի մարտի 1-ին վարչախմբին չխանգարեց այս օրենքի բացակայությունը, որ արտակարգ դրություն հայտարարվեր եւ զինված ուժերը գործի դրվեին: