Իրանի միջուկային ծրագրի հարցում Վաշինգթոնը կողմ է իրադրության կարգավորման դիվանագիտական միջոցներին, հայտարարել է ԱՄՆ-ի նախագահ Բարաք Օբաման` ելույթ ունենալով Սեուլի ուսանողների առաջ միջուկային անվտանգության գագաթաժողովի նախօրեին, որը բացվում է Հարավային Կորեայի մայրաքաղաքում մարտի 26-ին: Սակայն նաեւ Իսլամական հանրապետության ղեկավարությունը պետք է հրատապ քայլեր ձեռնարկի այդ ուղղությամբ:
Նա նշել է, որ դեռեւս ժամանակ կա դիվանագիտական լուծման համար, սակայն ժամանակը գնում է, եւ Իրանը պետք է արագ եւ ծայրահեղ լուրջ արձագանքի տվյալ պահի պահանջին: Սպիտակ տան ղեկավարը նաեւ նշել է, որ անկասկած Թեհրանն իր միջուկային ծրագրի իրականացման իրավունքն ունի, սակայն նա պարտավոր է համաշխարհային հանրությանը համոզել դրա խաղաղ բնույթի մասին, հայտնում է «ՌԻԱ Նովոստին»` հղում անելով BBC-ին:
Խոսելով ԿԺԴՀ-ի միջուկային ծրագրերի մասին` ամերիկյան ղեկավարը հայտարարել է, որ ԱՄՆ-ն թշնամաբար չի տրամադրված ԿԺԴՀ-ի իշխանությունների նկատմամբ եւ նույնիսկ պատրաստ է քայլեր ձեռնարկել Վաշինգթոնի եւ Փհենյանի հարաբերությունների բարելավման համար, սակայն ԿԺԴՀ-ն պետք է հրաժարվի միջուկային զենքից:
