Ամերիկյան հեռուստահաղորդավարուհի Օփրա Ուինֆրին այցելել է բրալիզացի հայտնի մեդիում եւ հեքիմ Ժուան դի Դեուսին:
Օփրան հարցազրույց է վերցրել նրանից, նաեւ հետեւել, թե ինչպես է Ժուանն այսպես կոչված «հոգեւոր վիրահատություն» անցկացնում` առանց անզգայացման: Հաղորդավարը լրագրողներին հայտարարել է, որ առայժմ չի կարողանում ամբողջությամբ մարսել տեսածը, ինչն ուղղակի ապշեցուցիչ էր:
69-ամյա Ժուան դի Դեուսի (Աստվածային Ժուանի) փորձերը ոչ միանշանակ գնահատականների են արժանանում: Ոմանք նրան հրաշագործ են համարում, որն ի վիճակի է բուժել քաղցկեղային հիվանդությունները եւ հիշողության թեթեւ կորուստը, իսկ մյուսներն էլ` սովորական խաբեբա: Այնուամենայնիվ, Ժուանի հիվանդանոցում ամեն օր բուժում են ստանում հազարավոր հիվանդներ: Ընդ որում, այցելուների նշանակալի մասը հեռվից եկող արտասահմանցիներ են, հաղորդում է ԻՏԱՌ-ՏԱՍՍ-ը:
Մեդիումը երեք անգամ հանդիպել է Բրազիլիայի նախկին նախագահ Լուլա դա Սիլվայի հետ, քանի դեռ նա կոկորդի քաղցկեղի բուժման կուրս էր անցնում Սան Պաուլոյի Սիրիա-լիբանանյան հիվանդանոցում: Այս շաբաթ հիվանդանոցի բժիշկները եկել են այն եզրակացությանը, որ Լուլա դա Սիլվայի մոտ այժմ արդեն ուռուցքի ակնհայտ դրսեւորումներ չկան:
Ըստ բրազիլական մամուլի պնդման` Լուլա դա Սիլվայի երաշխավորմամբ Ժուանի խորհրդատվությունից է օգտվել նաեւ Վենեսուելայի առաջնորդ Ուգո Չավեսը, որը եւս ուռուցքային հիվանդությամբ է տառապում: Չավեսը ճառագայթման կուրս է անցել Կուբայում:
