նախընտրելի դարձնել
Թուրքիայում համացանցում ապօրինի խաղադրույքներ կատարելու գործով 121 մարդ է կալանավորվել, ևս 45 կասկածյալի նկատմամբ դատական վերահսկողության միջոցներ են կիրառվել, հայտնել է Anadolu-ն՝ վկայակոչելով Ստամբուլի ոստիկանությանը։
Ոստիկանական գործողություններից հետո ընդհանուր առմամբ դատարան է ներկայացել 169 կասկածյալ։ Նրանցից երեքն ազատ է արձակվել։
Սկզբում Ստամբուլում և երկրի ևս 38 նահանգներում իրականացված գործողությունների ընթացքում ձերբակալվել էր 151 մարդ։ Ավելի ուշ իրավապահները ձերբակալել են ևս 18 կասկածյալի։
Քննությունն իրականացրել է Ստամբուլի ոստիկանության կիբեռհանցագործությունների դեմ պայքարի վարչությունը՝ քաղաքի դատախազության համակարգմամբ։ Կասկածյալներին հայտնաբերելու համար օգտագործվել է արհեստական բանականությամբ աշխատող AVCI նախագիծը։ Թուրքիայի ներքին գործերի նախարարության տվյալներով՝ քննիչները պարզել են ապօրինի գործունեության մասնակիցների ինքնությունը և նրանց դերը վիրտուալ բուքմեյքերական հարթակների ենթակառուցվածքում։
Քննության ընթացքում հայտնաբերվել են նաև բազմաթիվ խմբեր և կասկածյալներ, որոնք մեսենջերների միջոցով ապօրինի մոլախաղեր են կազմակերպել։
