Սթիվեն Միլլերի նշանակումը Սպիտակ տան աշխատակազմի ղեկավարի պաշտոնում վկայում է այն մասին, որ ԱՄՆ նախագահ Դոնալդ Թրամփը մտադիր չէ փոխզիջում փնտրել դեմոկրատների հետ Կոնգրեսի միջանկյալ ընտրություններում նրանց հաղթանակից հետո։ Ընդհակառակը՝ վարչակազմը պատրաստվում է քաղաքական դիմակայության նոր փուլի, իսկ Միլլերը կարող է դառնալ այդ պայքարի գլխավոր կազմակերպիչներից մեկը, գրել է Axios-ը։

Ի տարբերություն իր նախորդի՝ Սյուզի Ուայլսի, Միլլերը հանդես է գալիս նախագահի հնարավորինս լայն լիազորությունների, միգրացիայի խիստ սահմանափակման և ԱՄՆ հակառակորդների նկատմամբ ուժային ճնշման օգտին։ Վերջին տասնամյակի ընթացքում նա եղել է MAGA շարժման գլխավոր գաղափարախոսներից և Թրամփի կոշտ միգրացիոն քաղաքականության առանցքային հեղինակներից մեկը։

«Սթիվենը Թրամփի ռազմական խորհրդականն է»,— Axios-ին ասել է նախագահի վաղեմի ընկեր և խորհրդական Ռոջեր Սթոունը։

Միլլերը բազմիցս արտահայտվել է նախագահական իշխանության ընդլայնման օգտին և քննադատել այն դատավորներին, որոնք արգելափակել են արտաքսումների վերաբերյալ վարչակազմի որոշումները։ 2025 թվականին նա այդ դատավորներին անվանում էր արմատականներ, որոնք պայքարում են իշխանության գործադիր և օրենսդիր ճյուղերի դեմ։

Նա նաև հայտարարել է, որ Դեմոկրատական կուսակցությունը ոչ թե քաղաքական ուժ է, այլ «ներքին ծայրահեղական կազմակերպություն»։ Այժմ, երբ դեմոկրատները մեծամասնություն են ստացել Կոնգրեսում, նրանց հետ դիմակայությունը կարող է դառնալ Սպիտակ տան աշխատանքի գլխավոր ուղղություններից մեկը։

Միլլերը նշանակալի դեր է խաղում նաև վարչակազմի արտաքին քաղաքականության մեջ, հատկապես Լատինական Ամերիկայի հարցում։ Նա կողմ է թմրակարտելների դեմ կոշտ ուժի կիրառմանը և սերտորեն համագործակցում է պետքարտուղար և նախագահի ազգային անվտանգության հարցերով խորհրդական Մարկո Ռուբիոյի հետ։ Axios-ի տվյալներով՝ Միլլերը մասնակցել է նաև Վենեսուելայի նկատմամբ Վաշինգտոնի քաղաքականության ձևավորմանը։

Նշանակման կողմնակիցները կարծում են, որ նրա փորձը հատկապես օգտակար կլինի վարչակազմին այն պայմաններում, երբ Թրամփի օրենսդրական օրակարգը խոչընդոտների է բախվում Կոնգրեսում։ Նման իրավիճակում Սպիտակ տունը կարող է ավելի ակտիվորեն օգտագործել նախագահական հրամանագրերն ու դատական գործընթացները՝ ոլորտներ, որոնց Միլլերը լավ է տիրապետում։

Սակայն քննադատները մտավախություն ունեն, որ նրա ազդեցության մեծացումը կհանգեցնի էլ ավելի կոշտ միգրացիոն քաղաքականության և կվանի անկախ ու չափավոր ընտրողներին։ Axios-ի գնահատմամբ՝ դա կարող է բարդացնել հանրապետականների դրությունը 2028 թվականի նախագահական ընտրություններից առաջ։

Միաժամանակ, Թրամփի շրջապատը չի թաքցնում նոր քաղաքական հակամարտության պատրաստակամությունը։ «Միլլերի ժամանակն է»,— պարբերականին ասել է նախագահի մեկ այլ խորհրդական՝ կոչ անելով պատրաստվել հետագա սրացմանը։