նախընտրելի դարձնելԱՄՆ-ում նախընտրական առաջին բանավեճում հաղթել է հանրապետական թեկնածու Միթ Ռոմնին: Այդպիսին են ORC International-ի հետ CNN-ի համատեղ անցկացված հարցման արդյունքները:
Ռոմնիի օգտին իրենց ձայնն են տվել հարցվածների 67%-ը: Բարաք Օբամային հաղթող են ճանաչել 25%-ը:
Ըստ պատասխանողների 61%-ի՝ Օբաման հանդիպմանը վատ է ելույթ ունեցել: 82%-ը կարծում է, որ Ռոմնին սպասվածից լավ է հանդես եկել, նաեւ, 58%-ի կարծիքով, հանրապետական թեկնածուն իրեն որպես ավելի ուժեղ առաջնորդ է դրսեւորել: Գործող նախագահի մասին նույնն են ասել պատասխանողների միայն 37%-ը:
Հեռախոսային հարցմանը մասնակցել է 430 մարդ, հայտնում է «lenta.ru»-ն:
Մեկուկես ժամանոց բանավեճը տեղի է ունեցել հոկտեմբերի 3-ի երեկոյան` Դենվերի համալսարանում: Հանդիպման հիմնական թեման տնտեսությունն է եղել:
Թեկնածուների հաջորդ հանդիպումը կկայանա Հեմփսթեդում` հոկտեմբերի 16-ին: Հոկտեմբերի 11-ին բանավեճ կանցկացնեն նրանց գործընկերները, որոնք առաջադրվում են փոխնախագահի պաշտոնի համար` Ջո Բայդենը եւ Փոլ Ռայանը: ԱՄՆ-ում նախագահական ընտրությունները տեղի կունենան նոյեմբերի 6-ին:
