նախընտրելի դարձնելԹուրքիայի պաշտպանության նախարարությունը դիտարկում է չինական զենիթահրթիռային համակարգերը գնելու հնարավորությունը, թեեւ վերջնական որոշում դեռ չի կայացրել: Այս մասին հայտնում է Defense News-ը` վկայակոչելով պաշտպանական ոլորտում գնումների պատասխանատու թուրքկան գործակալությանը: Ըստ թուրք զինվորականների գնահատման` չինական արտադրության զենիթահրթիռային համալիրները լիովին բավարարում են Թուրքիայի տեխնիկական պահանջները, իսկ դրանց արժեքը զգալիորեն ցածր է արտասահմանյան համարժեքներից: Բացի դրանից, համալիրները գնելու դեպքում Չինաստանը պատրաստ է գնորդին տրամադրել արտադրական տեխնոլոգիաները:
Համալիրները գնելու վերաբերյալ վերջնական որոշումը կայացնելու են Թուրքիայի պաշտպանության նախարար Իսմեթ Յըլմազը եւ երկրի վարչապետ Ռեջեփ Թայիփ Էրդողանը: Որոշումը կհրապարակվի Թուրքիայի պաշտպանական արդյունաբերության խորհրդի նիստի ընթացքում (DIEC), որի ամսաթիվը դեռ չի նշանակվել: 2013թ. հունվարին Թուրքիայի պաշտպանության նախարարությունը դադարեցրել էր չորս միլիարդ դոլար արժողությամբ 12 զենիթահրթիռյին համալիրների մատակարարման մրցույթը: Երկրի ղեկավարությունը վճռել էր սեփական ՀՕՊ համակարգ ունենալ` արտասահմանյան գործընկերոջ աջակցությամբ, հաղորդում է lenta.ru-ն:
Մրցույթին մասնակցել էին ամերիկյան Raytheon/Lockhee Martin-ը, «Ռոսօբորոնէքսպորտը», չինական China Precision Machinery Export-Import Corporation-ը եւ եվրոպական EuroSam-ը: Նրանք թուրք զինվորականներին առաջարկել էին Patriot, С-300, HQ-9 (С-300В-ի փոփոխված տարբերակը) եւ Aster 30 SAMP/T համալիրներ: Ըստ Defense News-ի` մրցույթը չեղյալ չէր հայտարարվել, պարզապես փոխվել էին դրա պայմանները: Ավելի վաղ հաղորդվել էր, որ թուրք զինվորականները կարող են նախապատվությունը տալ ռուսական համալիրներին, սակայն ՆԱՏՕ-ի ղեկավարությունը երկրին առաջարկել էր չգնել դրանք:
