նախընտրելի դարձնել
Քիչ առաջ ոստիկանության Արաբկիրի բաժնից ազատ են արձակել «Armenia Today» կայքի համակարգող Արգիշտի Կիվիրյանին, քաղաքացիական ակտիվիստներ Անի Կաղինյանին, Լուսինե Հովսեփյանին եւ Նանե Մինասյանին, որոնց բաժնում պահել են շուրջ չորս ժամ:
Երեւանի Բաղրամյան պողոտայից ոստիկանները բռնի ուժ գործադրելով, ակտիվիստների շորերը պատռելով, Կիվիրյանին եւ մյուս երեք ակտիվիստներին բերման էին ենթարկել Սերժ Սարգսյանին դդում նվիրելու համար:
Փաստաբան Լուսինե Սահակյանը NEWS.am-ի թղթակցի հետ զրույցում հայտնեց, որ ոստիկանությունն ապօրինի, խայտառակ վարույթ է իրականացրել, օրենքով սահմանված ժամանակից ավելի է պահել բերման ենթարկվածներին: Կիվիրյանի եւ երեք ակտիվիստների դեմ հարուցվա վարչական վարույթում նշված է, թե չեն ենթարկվել «ոստիկանների օրինական պահանջին՝ դիմակները հանելու մոտեցել են Բաղրամյան 26-ին»:
Ավելի վաղ NEWS.am-ի թղթակցի հետ հեռախոսազրույցում Արգիշտի Կիվիրյանն ասել էր, որ Հալոուինի տոնի կապակցությամբ մի դդում էին տարել Բաղրամյան 26՝ նվիրելու Սերժ Սարգսյանին:
«Դդումը տվեցինք ոստիկաններին: Սրբորեն բռնել էին, ուրախացան, որ վերջը ինչ-որ մեկը Սերժ Սարգսյանին նվեր է տանում: Հուզվեցին, բայց դրանից հետո իջնում էինք դեպի Օպերա, երբ ապօրինի, առանց որեւէ հիմնավորում ներկայացնելու, Գիտությունների ակադեմիայի մոտից մեզ բռնի կերպով, քաշքշելով չորսիս գցել են ոստիկանական ավտոմեքենայի հետեւը: Ավելին` ոստիկանը գիրկս էր նստած, այդ վիճակում բերել են: Կատարյալ «իզվռաշենեց» են դարձել: Պատկերացրեք ոստիկանը գալիս նստում է իմ գիրկը: Արդեն հասել ենք այդ օրին»,- ասել էր Արգիշտի Կիվիրյանը:
