նախընտրելի դարձնելCharlie Hebdo-ի նոր համարի եւ այդ պարբերականին բաժանորդագրվելու ակտիվացումը այդ խմբագրությանը ավելի քան 10 մլն եվրո եկամուտ է բերել: Այդ գումարի մեջ ներառվել են նաեւ տասնյակ հազարավոր քաղաքացիների կողմից կատարված դրամական փոխանցումները, որոնք արվել էին երգիծաթերթի խմբագրության աշխատակիցների մեծ մասի կյանքը խլած ահաբեկչությունից հետո:
Նախկին 60 հազարի փոխարեն պարբերականը նախ տպվել է 1 միլիոն տպաքանակով, այնուհետեւ տպաքանակը հասցվել է երեք միլիոնի, ավելի ուշ՝ ֆրանսիական մամուլի համար ռեկորդային հինգ միլիոնի: Ներգրավվել էին երեք խոշոր տպագրատներ:
Առաջին օրվա վաճառքից Charlie Hebdo-ն շուրջ 8 մլն եվրո է ստացել: Այլ լրատվամիջոցների եւ տպագրատների համերաշխության շնորհիվ շաբաթաթերթը ստանում է առաջին միլիոն օրինակներից ստացված եկամտի 100 տոկոսը, որը շուրջ 3 միլիոն եվրո է:
Նույն օրերին կտրուկ աճել է նաեւ Charlie Hebdo -ին բաժանորդագրվողների թիվը՝ 7 հազարից 120 հազար:
Ընդ որում՝ չնայած անարխիստական ուղղվածությանը, շաբաթաթերթին բաժանորդագրված են քաղաքային շատ գրադարաններ, պետկառույցներ եւ մասնավոր խոշոր կորպորացիաներ: Air France-ն ուղեւորների համար ձեռք է բերել նոր համարի մոտ 20 հազար օրինակ, որը կրոնական թեմաներով ծաղրանկարներ է պարունակում:
Նախկինում Charlie Hebdo-ին հաջողվում էր վաճառել 28 հազարից ոչ ավելի, ինչը խմբագրությանը ֆինանսական կրախի շեմին էր հասցրել:
