նախընտրելի դարձնել
ՄԱԿ-ում Հայաստանի մշտական ներկայացուցիչ Կարեն Նազարյանը նամակ է հղել կառույցի գլխավոր քարտուղար Բան Կի Մունին, որտեղ մեղադրել է Ադրբեջանի իշխանություններին պատմական փաստերը աղավաղելու, բանակցային գործընթացը խոչընդոտելու եւ ռազմական գործողություններ հրահրելու մեջ։
«Իր ագրեսիվ դիրքորոշումը արդարացնելու համար Ադրբեջանը թշնամություն, ռասայական ատելություն եւ նախապաշարումներ է սերմանում Հայաստանի եւ Լեռնային Ղարաբաղի նկատմամբ», -գրել է ՄԱԿ-ում Հայաստանի ներկայացուցիչն ու հավելել, որ թշնամալից հայտարարությունները ուղեկցվում են հայկական մշակութային ժառանգության ոչնչացմամբ։
«Ցավոք, չնայած Հայաստանի բազմաթիվ հորդորներին, ՄԱԿ-ի կառույցները, մասնավորապես` ՅՈւՆԵՍԿՕ-ն, որեւէ ուշադրություն չեն դարձնում վանդալիզմի այդ փաստերին»,- իր նամակում նշել է Կ. Նազարյանը, ըդգծելով, որ Ադրբեջանն իր քաղաքականությամբ խախտում է ՄԱԿ-ի կանոնադրությամբ սահմանված նորմերը, խոչընդոտում է տարածաշրջանային համագործակցությանը եւ դրանով իսկ սպառնալիք ստեղծում միջազգային անվտանգության ու խաղաղության համար։
«Առաջին իսկ օրվանից Ադրբեջանը որդեգրել է ղարաբաղյան խնդիրը ուժային միջոցներով լուծելու քաղաքականություն: Շարունակելով այդ քաղաքականությունը` Ադրբեջանը հաշվի չի առնում ՄԱԿ-ի գլխավոր քարտուղարի, ԵԱՀԿ-ի անդամ երկրների, Մինսկի խմբում համանախագահող պետությունների եւ այլ կառույցների հորդորները` հրադադարի ռեժիմը ամրապնդելու ուղղությամբ, միջադեպեր է հրահրում շփման գծում եւ փորձում է խոչընդոտել ԵԱՀԿ-ի Մինսկի խմբի շրջանակներում իրականացվող բանակցային գործընթացին»- գրել է Հայաստանի ներկայացուցիչն ու հավելել. «Եթե Ադրբեջանը իսկապես շահագրգռված է Ղարաբաղյան խնդրի կարգավորմամբ, ապա պետք է իր էներգիան եւ միջոցները ուղղի բանակցային գործընթացում իրական, ոչ թե ձեւական դեր ստանձնելուն»:
