նախընտրելի դարձնել
Երեւանի եւ Մոնրեալի միջեւ հետագա համագործակցության ընդլայնման, փորձի փոխանակման եւ մասնագետների վերապատրաստման վերաբերյալ հարցեր են քննարկվել Երեւանի քաղաքապետ Կարեն Կարապետյանի եւ Կանադայում հայկական թեմի առաջնորդ Բագրատ եպիսկոպոս Գալստանյանի հանդիպման ժամանակ:
Քաղաքապետարանի մամուլի ծառայությունից NEWS.am-ին հայտնում են, որ Բագրատ եպիսկոպոս Գալստանյանը քաղաքապետին է փոխանցել Մոնրեալի քաղաքապետի պատրաստակամությունը` Երեւանի եւ Մոնրեալի միջեւ կնքված փոխըմբռնման հուշագրի շրջանակում երկու քաղաքների միջեւ փոխշահավետ գործակցություն ծավալելու առումով:
Կարեն Կարապետյանն ընդգծել է, որ Երեւանի քաղաքապետարանի եւ գործընկեր քաղաքների միջեւ ձեւավորված հարաբերությունները պետք է լինեն առարկայական եւ ստանան համագործակցության նոր որակ ու ընթացք:
Նա հյուրին է ներկայացրել քաղաքապետարանի նախաձեռնությամբ վերջերս ներդրված «Օգնիր դպրոցիդ» էլեկտրոնային կայքի նպատակները. «Այս նախաձեռնության միջոցով մենք ցանկություն ունենք, որ յուրաքանչյուր անհատ Երեւանում, թե Երեւանի սահմաններից դուրս իր կարողությունների չափով օգնի իր դպրոցին»,- շեշտել է Կարեն Կարապետյանը:
Կանադայում հայկական թեմի առաջնորդը ողջունել է քաղաքապետի այս ձեռնարկը. «Ես այս քաղաքի զավակն եմ եւ ես մեծ ուրախությամբ կկատարեմ իմ հանգանակությունը` օգնելու իմ հարազատ դպրոցին»,- նշել է Բագրատ եպիսկոպոս Գալստանյանը, խոստանալով, որ այս նախաձեռնության մասին կտեղեկացնի նաեւ Կանադայի հայ համայնքին:
Հանդիպման ընթացքում քննարկվել են նաեւ Երեւանում Մոնրեալի այգի ստեղծելու ծրագրի հետ կապված հարցեր: Առաջիկայում Երեւանի քաղաքապետարանը կպատրաստի եւ կանադական կողմին կներկայացնի համապատասխան նախագիծ:
