նախընտրելի դարձնել
Դատաիրավական ոլորտի բարեփոխումները միտված են բարեփոխելու դատական համակարգն ու թեթեւացնելու դատարանների գերծանրաբեռնվածությունը։ Այս մասին Հայաստանում Մեծ Բրիտանիայի եւ Հյուսիսային Իռլանդիայի դեսպան Ջոն Գալագերինի հետ հանդիպմանն ասել է Արդարադատության նախարար Գրիգոր Մինասյանը։
Ինչպես NEWS.am-ը տեղեկանում է Արդարադատության նախարարությունից, Գրիգոր Մինասյանը դեսպանին է ներկայացրել արդարադատության ոլորտի բարեփոխումների օրակարգը։
Մասնավորապես, անդրադարձել է դատաիրավական բարեփոխումներին, պրոբացիայի ծառայության, Արբիտրաժային նոր կենտրոնի ստեղծման, հաշտարարության ոլորտի բարեփոխումներին ուղղված աշխատանքներին:
Խոսելով՝ հանրային կառավարման բարեփոխումների մասին, նախարարը նշել է, որ այս բարեփոխումն ուղենիշային է երկրի զարգացման համար եւ այն Կառավարության առաջնահերթություններից մեկն է:
Նախարարը նշել է, որ Արդարադատության ոլորտում առկա իրավիճակը բարելավելու նպատակով՝ ներկայումս իրականացվում են նաեւ թվայնացման ոլորտի աշխատանքներ, մասնավորապես էլեկտրոնային արդարադատության՝ E-Justice հարթակի պատրաստման ուղղությամբ:
Դեսպանը բարձր է գնահատել Հայաստանի ջանքերը, որոնք ուղղված են բարեփոխելու արդարադատության ոլորտը:
Հանդիպմանը՝ նախարարն ու դեսպանը խոսել են հնարավոր աջակցության եւ արդարադատության ոլորտի բարելավման նպատակով փորձի փոխանակման կարեւորության մասին:
Կողմերը պայմանավորվել են ընդլայնել համագործակցությունն ու մտքեր են փոխանակել երկուստեք հետաքրքրություն ներկայացնող այլ հարցերի շուրջ:
