նախընտրելի դարձնելՖրանսիական Սենտ Էթիեն քաղաքի Անտուան Դյուրաֆուր փողոցի բարերից մեկի ցուցափեղկը թուրք ցուցարարները ջարդուփշուր են արել, գրում է ֆրանսիական «Le Progrès»-ը:
Թղթակիցը հանդիպել է բարի սեփականատեր Ռիշար Սիսիի հետ, ով պատմել է. «Ես ծագումով քուրդ ֆրանսիացի եմ: Երբ թուրք ցուցարաներն անցնում էին իմ բարի մոտով, ոմանք թուրքերեն ասացին ` «Այրեք»: Նրանցից ոմանք ցանկացան ներս մտենել: Իմ գանձապետուհին, ով հղի էր, սկսեց իրեն վատ զգալ եւ անհետաձգելի օգնության կարիք եղավ: Դրանից հետո ցուցարարները կոտրեցին ցուցափեղկը: Կարծում եմ` նրանք այստեղով պատահական չէին անցնում»: Ռիշարն այդ ագրեսիան չի հասկանում. «Այստեղ մենք մեր աշխատանքն ենք անում: Ես ինը աշխատակից ունեմ: Մենք չենք զբաղվում ոչ քաղաքականությամբ, ոչ կրոնական հարցերով»:
Նրան հետաքրքրում է, թե ինչու ոստիկանությունը չի միջամտել. «Այսօր ես վախենում եմ եւ իմ, եւ ընտանիքիս համար: Ով կարող է ասել, որ նրանք չեն գա եւ չեն այրի»: Ռիշարը բողոք է ներկայացրել Սենտ Էթիենի ոստիկանական բաժանմունք:
Նշենք, որ շաբաթ օրը Սենտ Էթիենում անսպասելիորեն ցույց է կազմակերպվել, նույնիսկ իշխանությունները տեղեկացված չեն եղել: Մոտ վաթսուն մարդ, թուրքական դրոշներով, հավաքվել են քաղաքապետարանի մոտ` բողոքելով թուրք զինվորականների նկատմամբ Քրդական բանվորական կուսակցության գրոհների դեմ: Այնուհետեւ երթով շարժվել են դեպի քաղաքի կենտրոն, որի ժամանակ էլ տեղի է ունեցել միջադեպը:
