Բելգիայի գահի 23-ամյա ժառանգորդ արքայադուստր Եղիսաբեթը կկարողանա շարունակել ուսումը Հարվարդի համալսարանում, հայտնել են նրա ներկայացուցիչները, երբ հայտնի է դարձել, որ ԱՄՆ կառավարությունը որոշել է օտարերկրացի ուսանողներին արգելել սովորել Հարվարդում, հաղորդում է Reuters-ը։

«Ես կարող եմ հաստատել, որ այս պահին, կարծես թե, բոլոր պայմանները ստեղծված են, որպեսզի արքայադուստրը շարունակի ուսումը Հարվարդում»,- երեքշաբթի հայտարարել է Բելգիայի թագավորական պալատի հաղորդակցության հարցերով տնօրեն Քսավյե Բաերտը։

Մայիսին, երբ Թրամփի վարչակազմը հայտարարեց արգելքի մասին, Թագավորական պալատը մտահոգություն հայտնեց, որ արքայադուստր Եղիսաբեթը, որպես Բելգիայի քաղաքացի, կարող է զրկվել Հարվարդում ուսումը շարունակելու հնարավորությունից։

Սակայն հունիսին դաշնային դատավորն արգելափակեց Թրամփի վարչակազմի ստորագրած գործադիր հրամանագրի կիրառումը, որը նպատակ ուներ արգելելու օտարերկրացիների մուտքը ԱՄՆ՝ Հարվարդում սովորելու համար։

Թրամփի վարչակազմը հայտարարել է, որ փոփոխություններ է փնտրում Հարվարդում և ԱՄՆ այլ առաջատար համալսարաններում՝ պնդելով, որ դրանք դարձել են «արթնացած ձախակողմյան մտքի և հակասեմիտիզմի» ամրոցներ, ինչը նրանք հերքում են։

Վարչակազմը բողոքարկել է դատավորի որոշումը, սակայն սեպտեմբերի 2-ին սկսվող նոր ուսումնական տարվա հետ մեկտեղ օտարերկրացի ուսանողների դեմ արգելքը մնում է ուժի մեջ։

Բելգիայի ապագա թագուհին Հարվարդում սկսում է հանրային քաղաքականության երկամյա մագիստրոսական ծրագրի երկրորդ կուրսը, որը նախատեսված է ուսանողների մտահորիզոնն ընդլայնելու և նրանց հմտությունները կատարելագործելու համար՝ «հանրային ծառայության մեջ հաջող կարիերայի» համար, գրում է Հարվարդի պաշտոնական կայքը։

Վերջին ուսումնական տարում 388-ամյա համալսարանն ուներ գրեթե 6800 օտարերկրացի ուսանող, որը կազմում էր ուսանողական ընդհանուր կազմի մոտ 27%-ը։