Քրդստանի աշխատավորական կուսակցության (PKK) որոշ մարտիկների մայրերը չորեքշաբթի կոչ են արել համաներում հայտարարել իրենց զավակների համար և դադարեցնել տասնամյակներ շարունակվող սպանությունների գործելաոճը Թուրքիայի խորհրդարանական հանձնաժողովի առջև, որը վերահսկում է շարժման զինաթափումը, հայտնել է Reuters-ը։

«Մենք՝ մայրերս, այլևս չենք ուզում լաց լինել։ Եկեք թաղենք զենքերը, ոչ թե մեր երեխաներին, - «Խաղաղության մայրեր» խմբի անունից պատգամավորներին է դիմել քուրդ մայր Նեզահաթ Թեքեն։

«Ազգային համերաշխության, եղբայրության և ժողովրդավարության հանձնաժողով» կոչվող հանձնաժողովը նպատակ ունի հարթել երկարատև խաղաղության ճանապարհը, որը արձագանք կգտնի նաև հարևան Սիրիայում։

«Եթե ուզում ենք, որ ավելի շատ զենք այրվի, այս մարդկանց պետք է հնարավորություն տրվի։ Եթե նրանք լեռներից իջնեն միայն ցմահ բանտարկության դատապարտվելու համար, ինչպե՞ս կարող ենք համոզել ուրիշներին այրել իրենց զենքերը»,- ասել է խաղաղության մայրերի խորհրդանիշն սպիտակ գլխաշոր կապած Թեքեն։

Մեկ այլ մայր՝ Ռեբիյա Կիրանը, օրենսդիրներին խնդրել է ընդունել կանոններ, որոնք կպաշտպանեն PKK անդամներին երկարատև բանտարկությունից։ «Եթե դուք խաղաղություն եք ուզում, թող նրանք զբաղվեն քաղաքականությամբ, այլ ոչ թե բանտարկվեն»,- ասել է նա։

Թուրքական պետության և ՔԱԿ-ի միջև չորս տասնամյակ տևած հակամարտության ընթացքում ավելի քան 40 հազար մարդ է զոհվել։

PKK-ն, որը սկսել է պայքարը Թուրքիայի դեմ 1984 թվականին, մայիսին հայտարարեց, որ զինաթափվում և լուծարվում է, իսկ անցյալ ամիս իր մի քանի անդամներ Հյուսիսային Իրաքի լեռնային հատվածում խորհրդանշական արարողության ժամանակ այրեցին իրենց զենքերը։