Նախընտրելի
Իտալիայի Ռիմինի նահանգում՝ Գերմանիայի դաշնային դատախազության հարցումով ձերբակալվել է Ուկրաինայի քաղաքացի Սերգեյ Կ.-ն, ով կասկածվում է «Հյուսիսային հոսք-1» և «Հյուսիսային հոսք-2» գազատարների պայթեցմանը մասնակցելու մեջ։ Այս մասին հաղորդվում է Գերմանիայի դատախազության կայքում։
Գերմանական հետաքննության տվյալներով՝ Սերգեյ Կ.-ն եղել է այն խմբի անդամ, որը 2022 թվականի սեպտեմբերին գազատարների վրա պայթուցիկ սարքեր է տեղադրել։ Կասկածյալը այս գործողության համակարգողներից մեկն է։ Գազատարներին հասնելու համար խումբը միջնորդների միջոցով գերմանական ընկերությունից զբոսանավ է վարձակալել՝ օգտագործելով կեղծ փաստաթղթեր։
Ձերբակալվածին նախատեսում են արտահանձնել Գերմանիա և դատարանի առաջ կանգնեցնել։
Բալթիկ ծովում գազատարների պայթյունները տեղի են ունեցել 2022 թվականի սեպտեմբերի 28-ի գիշերը։ The Wall Street Journal-ը գրել է, որ գործողությունը մտահղացել է ուկրաինացի սպաների մի խումբ՝ 2022 թվականի մայիսին։ Գազատարը պայթեցնելու գաղափարը, որով ռուսական գազը շարունակում էր հոսել Գերմանիա՝ միլիարդավոր դոլարներ բերելով Մոսկվային, նրանք համարել են Վլադիմիր Պուտինին «իր ագրեսիայի համար վճարելու» լավագույն միջոցը։ Ուկրաինայի նախագահ Վոլոդիմիր Զելենսկին սկզբում հավանություն է տվել ծրագրին, սակայն Կենտրոնական հետախուզական վարչությունը իմանալով այդ մասին, խնդրել է նրան հրաժարվել գործողությունն իրականացնելուց։ Ուկրաինայի նախագահը պահանջել է դադարեցնել նախապատրաստական աշխատանքները, սակայն Վալերի Զալուժնին, ով այդ պահին ԶՈւ գլխավոր հրամանատարի պաշտոնն է զբաղեցրել՝ անտեսել է հրամանը, նշել է WSJ-ը։
