Թաիլանդի Քրեական դատարանը նախկին վարչապետ Թաքսին Չինավատից հանել է միապետությանը ենթադրաբար վիրավորելու մեղադրանքները։ Այս մասին հայտնել է Thai PBS հեռուստաալիքը։

«Մեղադրանքները հանված են», - ասել է Չինավատը դատարանից դուրս գալիս։

Չինավատը, որը կառավարության ղեկավարի պաշտոնը զբաղեցրել է 2001-2006 թվականներին, ավելի վաղ հերքել էր իրեն առաջադրված մեղադրանքները։ Թաիլանդի Քրեական օրենսգրքի 112-րդ հոդվածը պաշտպանում է թագավորական ընտանիքի անդամների պատիվն ու արժանապատվությունը և դրա խախտման համար նախատեսում է 3-ից 15 տարի ազատազրկում։ Մեղադրող կողմը պնդում էր, որ Չինավատը 2015 թվականի մայիսին Սեուլում արված մեկնաբանություններում արատավորել է միապետությունը։ Այն ժամանակ «Չոսոն իլբո» թերթին տված հարցազրույցում նա հայտարարել էր, որ Գաղտնի խորհրդի (Թաիլանդի թագավորին կից խորհրդակցական մարմին) անդամներն աջակցել են 2014 թվականի մայիսի 22-ի պետական հեղաշրջմանը, որի արդյունքում տապալվել է նախկին վարչապետի կրտսեր քրոջ՝ Յինգլակ Չինավատի գլխավորած կառավարությունը։

Դատարանն արդյունքում գտել է, որ փաստացի հարցազրույցն ավելի շատ տեղեկատվություն է պարունակել, քան ներկայացվել էր։ Միևնույն ժամանակ, ամբաստանյալի հայտարարությունները թագավորի մասին ուղղակի հիշատակում չեն պարունակել։

2024 թվականի հունիսին դատարանը բավարարել էր Չինավատի փաստաբանների միջնորդությունը՝ նախկին վարչապետին դատավարության ընթացքում 500 հազար բահտի (14,5 հազար դոլար) գրավի դիմաց ազատ արձակելու վերաբերյալ։