Եվրամիությունը կարող է օգտագործել ԱՄՆ նախագահ Դոնալդ Թրամփի՝ Խաղաղության Նոբելյան մրցանակ ստանալու ցանկությունը Ուկրաինայում հակամարտության կարգավորման հարցում։ Այսպիսի եզրակացության է եկել բրիտանական The Economist թերթը։

Ըստ նյութի հեղինակների, եվրոպացի առաջնորդները պետք է հրապարակայնորեն հայտարարեն Խաղաղության Նոբելյան մրցանակի համար Թրամփի թեկնածությանն աջակցելու մասին և մրցանակաբաշխության կոմիտե ուղարկեն նամակներ՝ ամերիկացի առաջնորդին մրցանակի հնարավոր շնորհումը հավանության արժանացնելու վերաբերյալ։ Թերթն ընդգծում է, որ թեև նման առաջադրումներն արժեք չունեն, քանի որ ավելի քան 100 հազար գիտնականներ, պրոֆեսորներ և այլ մարդիկ կարող են քննարկման ներկայացնել գրեթե ցանկացած թեկնածություն, սակայն Եվրոպայի կողմից Թրամփին ցուցաբերվող աջակցությունը կարող է նրան դրդել ավելի ակտիվ մասնակցություն ունենալ Ուկրաինայում հակամարտության կարգավորման գործում։

Նշվում է, որ ԵՄ-ն գործնականում դժվար թե կարողանա ազդել կոմիտեի վրա, քանի որ որոշումը կայացնում են քաղաքական գործիչների և քաղաքացիական հասարակության ներկայացուցիչ հինգ նորվեգացի պաշտոնյաներ։

Օգոստոսի 15-ին NBC հեռուստաընկերությունը, հղում անելով Սպիտակ տան ներկայացուցչին, հայտնել էր, որ Թրամփը շատ է ուզում ստանալ Խաղաղության Նոբելյան մրցանակը, բայց չի կարծում, որ դա իրեն կհաջողվի։

Ավելի վաղ նորվեգական լրատվամիջոցները հայտնել էին, որ Ամերիկայի նախագահը Նոբելյան մրցանակի վերաբերյալ զանգահարել է Նորվեգիայի ֆինանսների նախարար, ՆԱՏՕ-ի նախկին գլխավոր քարտուղար Յենս Ստոլտենբերգին։ Սպիտակ տան ներկայացուցիչը հաստատել է, որ Թրամփը հեռախոսով զրուցել է Ստոլտենբերգի հետ, սակայն չի հստակեցրել, թե ինչին է նվիրված եղել խոսակցությունը։