նախընտրելի դարձնել
Եվրամիությունը բացառություններ չի անի ամերիկյան ընկերություններին՝ կլիմայի փոփոխության կանոնակարգերին համապատասխան. դա կնշանակի համայնքի համար «կարմիր գծերի» հատում, հաղորդել է եվրոպական Politico պարբերականը՝ հղում կատարելով աղբյուրներին։
Ավելի վաղ բրիտանական Financial Times թերթը, հղում կատարելով ԱՄՆ վարչակազմի փաստաթղթին, հավաստիացրել էր, որ Վաշինգտոնը խնդրել է ԵՄ-ում գործող ամերիկյան ընկերություններին բացառություն տրամադրել տեղական կարգավորող մարմիններին «կլիմայի անցման ծրագրեր» ներկայացնելու պարտավորությունից, որը կներառի կանաչ տեխնոլոգիաների ներդրում։ Նշվել է, որ ԱՄՆ պահանջները միակողմանի են եւ չեն ենթադրում համապատասխան զիջումներ դրա դիմաց։
«Մենք միշտ ասել ենք, որ չենք բանակցում այս հարցերի շուրջ»,- ասել է Եվրահանձնաժողովի (ԵՀ) անանուն ներկայացուցիչը։ ԵՄ երկրներից մեկի դեսպանն ավելացրել է, որ «նրանք (ԱՄՆ-ը) ունեն իրենց կարմիր գծերը», մինչդեռ ԵՄ-ն ունի «իրենը»։
Հոկտեմբերի 8-ին տեղի է ունեցել ԵՄ դեսպանների հետ փակ հանդիպում։ Թերթի տվյալներով՝ ԵՀ առեւտրի գլխավոր տնօրեն Սաբինա Վեյանդը, ելույթ ունենալով հանդիպման ժամանակ, ընդգծել է, որ ԵՄ-ը չի օգտագործի այս փաստաթուղթը որպես բանակցությունների հիմք։ Ավելին, ԵՄ դեսպաններին թույլ չեն տվել տեսնել փաստաթղթի բովանդակությունը։ Ավելի ուշ ԵՀ խոսնակ Օլոֆ Գիլը հրաժարվել է ճեպազրույցի ժամանակ հաստատել փաստաթղթի ստացումը։ Սակայն նա հայտարարել է, որ ԵՄ-ը «մտադիր չէ չեղարկել որեւէ օրենք»։
Հուլիսի 27-ին Եվրահանձնաժողովի նախագահ Ուրսուլա ֆոն դեր Լյայենը եւ Թրամփը համաձայնության էին եկել, որ Վաշինգտոնը օգոստոսի 1-ից սկսած կսահմանի 15 տոկոս մաքսատուրք ԱՄՆ ներմուծվող եվրոպական ապրանքների մոտ 75 տոկոսի վրա՝ եվրոպական բոլոր ներմուծումների վրա 30 տոկոս մաքսատուրք սահմանելու Սպիտակ տան սպառնալիքի փոխարեն։ ԵՄ-ը մաքսատուրք չի սահմանի ամերիկյան ապրանքների վրա։ Եվրահանձնաժողովը խոստացել է ամբողջությամբ արգելել ռուսական էներգետիկ ռեսուրսների բոլոր ներմուծումները ԵՄ եւ գնել 750 միլիարդ դոլարի ամերիկյան նավթ, գազ, միջուկային սարքավորումներ եւ վառելիք, ինչպես նաեւ ներդնել 600 միլիարդ դոլար ԱՄՆ տնտեսությունում։
