Նախընտրելի
Վենեսուելան անսպասելի կոշտ քայլ է կատարել կադրային քաղաքականության մեջ. շարունակվող քաղաքական ճգնաժամի և իշխանության վերադասավորումների ֆոնին երկրի ղեկավար, նախագահի պաշտոնակատար Դելսի Ռոդրիգեսը պաշտպանության նախարար է նշանակել Գուստավո Գոնսալես Լոպեսին։ Նա փոխարինել է երկար տարիներ այդ պաշտոնում աշխատող Վլադիմիր Պադրինո Լոպեսին, հայտնում է Financial Times-ը։
Գոնսալես Լոպեսը ծայրահեղ հակասական կերպար է նույնիսկ հենց Վենեսուելայում։ Մինչև վերջերս նա ղեկավարում էր SEBIN գաղտնի ծառայությունը և համարվում էր «ռեժիմի բռնատիրական համակարգի առանցքային ճարտարապետներից մեկը», գրում է պարբերականը։
Նրա կառույցը մեղադրվում էր խոշտանգումների կիրառման, կամայական ձերբակալությունների և անցյալ տասնամյակում ընդդիմադիր շարժումը ճնշելու մեջ։
Քննադատները Լոպեսին անվանում են «գլխավոր դահիճ»՝ բանտերի և հարցաքննության կենտրոնների կազմակերպման գործում նրա ունեցած դերի պատճառով, որտեղ պարբերաբար արձանագրվել են մարդու իրավունքների խախտման դեպքեր։ Նախկինում նա արդեն հայտնվել էր ԱՄՆ-ի, Մեծ Բրիտանիայի և ԵՄ-ի պատժամիջոցների տակ՝ բռնաճնշումների գործելաոճի և քաղաքական ընդդիմության նկատմամբ վերահսկողության կոշտ մեթոդների հետ ունեցած կապի համար։
Ռազմական գերատեսչության ղեկավարի պաշտոնում գեներալի նշանակումը վերլուծաբանների կողմից դիտարկվում է որպես նախկին վարչակարգին մոտ կանգնած շրջանակների ներսում իշխանությունը պահպանելու փորձ: Որոշ փորձագետների կարծիքով՝ սա փաստում է, որ չնայած Ռոդրիգեսի ղեկավարությամբ բարեփոխումների և նոր ուղղության մասին պաշտոնական հայտարարություններին, իրականում ուժային հիմնական դիրքերը մնում են այն մարդկանց ձեռքում, ովքեր առնչություն են ունեցել բողոքի ցույցերի ճնշմանը և հասարակության նկատմամբ խիստ վերահսկողության պահպանմանը:
