«Բլից հարցազրույցներ ԱԺ պատգամավորների հետ» շարքի շրջանակներում NEWS.am-ը ներկայացնում է իր հերթական հարցազրույցը: Այս անգամ զրուցել ենք Հայ ազգային կոնգրես խմբակցության քարտուղար, պատգամավոր Արամ Մանուկյանի հետ:
Արամ Մանուկյան` մարդ...
Պարզ, հասարակ:
Որտեղի՞ց եք գալիս եւ ո՞ւր եք գնում:
Գալիս եմ բնությունից, գնում եմ անհայտություն:
Ձեր մանկությունը:
Անտառներում, գետերում, սարերում վազվզող, ես մեծացել եմ բնության գրկում, եւ իմ կենագրության վրա Լոռվա բնաշխարհը շատ լուրջ հետք է թողել:
Ինչպիսի՞ն եք տանը, աշխատավայրում եւ ընկերների հետ:
Նույնը՝ անմիջական եւ պարզ:
Կյանքի եւ մահվան հանդեպ ձեր վերաբերմունքը:
Փիլիսոփայական, անտարբեր:
Մենախոսություն ձեր եւ ձեր միջեւ:
Շատ ավելի հաճախ է լինում, քան իմ եւ ուրիշների միջեւ:
Ինչպե՞ս ապրել, որ ճիշտ ապրել:
Ենթարկվել խղճին եւ այդ դեպքում ճիշտ կապրես:
Որտե՞ղ կցանկանայիք ապրել:
Փոքրիկ Իշխանի երկրում:
Տարբեր պաշտոններ եք զբաղեցրել: Ո՞րն էր ձեզ համար ամենաբարձր պաշտոնը:
Ամենաբարձր պաշտոնը մանկավարժինն է: Ես բնույթով մանկավարժ եմ, գիտեմ մարդկանց հետ շփվելու գաղտնիքները, դա ինձ հիմա էլ է օգնում: Մանկավարժությունը ինձ համար սերտ կապված է բնության հետ, միշտ փորձել եմ համատեղել բնությունը մանկավարժության հետ:
Երբ մանկավարժ էիք, շփվում էիք երեխաների հետ, այժմ շփվում եք պատգամավորների հետ: Ի՞նչ տարբերություն երեխաների եւ պատգամավորների միջեւ:
Երեխաները անարատ են, պատգամավորները՝ կեղտոտված են: Նույնիսկ հիմա զարմանում են, թե որոշ պատգամավորներ ո՞նց կարող էին երեխա լինել:
Երջանկությունը ի՞նչ գույն ունի:
Ինձ համար զգացմունքների սուր դրսեւորումները գոյություն չունի: Ես չգիտեմ, թե ինչ է երջանկությունը:
Ամենաշատը ձեր մեջ ի՞նչն եք սիրում եւ ի՞նչը չեք սիրում:
Սիրում եմ, որ հասարակ եմ, մարդամոտ եմ, շփվող եմ: Չեմ սիրում, որ շատ հեշտ հավատում եմ բոլորին:
Թուլություններ եւ թերություններ, առավելություններ եւ առանձնահատկություններ:
Թուլություններս եւ թերություններս դրանք իմ առավելություններն ու առանձնահատկություններն են: Դրանք են անմիջականությունը, բոլորին հավատալը եւ վստահելը:
Ձեր կյանքի ամենամեծ սխալը:
Չունեմ կամ չեմ տեսնում:
Ինչո՞ւմ եք ձեզ ամենից շատ մեղադրում:
Մեծ հաշվով՝ չեմ մեղադրում, որովհետեւ եթե նորից ապրեի, կապրեի նույն ձեւով:
Ստացվում է, որ մեր պատգամավորները սրբերի շարքում դասված Գրիգոր Նարեկացուց էլ սուրբ են: Դուք մեղք չե՞ք գործել:
Եթե գործել էլ եմ, չեմ ասի:
Կարգախոս, ինչո՞վ եք առաջնորդվում կյանքում:
Չունեմ, իմ ներքին մղումներն են ինձ առաջնորդում: Դրանք հիմնված են բարոյականության եւ խղճի վրա:
Ինչի՞ց եք հոգնում եւ ո՞ւմ եք օգնում:
Հոգնում եմ, երբ ինձ չեն հասկանում, օգնում եմ, ում որ կարող եմ: Դրանից ես հաճույք եմ ստանում:
Ե՞րբ եք լռում:
Երբ դիմացինս չի հասկանում կամ դիմացինս ինձնից խելոք է:
Ո՞վ է ձեզնից խելոք:
Իմ շրջապատում շատ մարդիկ կան, որ ինձնից խելոք են, որոնց հետ շփվելը ինձ բավականություն է պատճառում, օրինակ` Լեւոն Տեր-Պետրոսյան, Հրանտ Մաթեւոսյան, Վանո Սիրադեղյան եւ այլք:
Ի՞նչը կարող է ձեզ ուրախացնել եւ տխրեցնել:
Ցանկացած փոքր հաջողություն իմ եւ ընկերներիս ինձ ուրախացնում է: Ցանկացած փոքր միջադեպ կարող է ինձ տխրեցնել:
Ինչի՞ համար եք զղջում:
Որ չարչարանքներս, պայքարս վերջնական կամ շոշափելի արդյունքի չի հասցնում:
Իսկ ինչի՞ չի հասցնում:
Ցավոք, այդ ամենը կախված չէ միայն իմ ցանկությունից: Կամ էլ գուցե շատ չեմ ցանկանում:
Ո՞ւմ կամ ի՞նչ եք սիրում եւ ատում:
Ատել չունեմ, ատելը ինձ համար ինքնաքայքայում է, ատելը վնասում է ատողին, քան ում ատում ես: Նույնը սիրո դեպքում է, սերը ավելի շատ քեզ է ուժեղացնում, քան նույնիսկ այն մարդուն, ում սիրում ես:
Ինչի՞ց կամ ումի՞ց եք հիասթափվել:
Հիասթափվել եմ այն ընկերներից, որոնք իմ կողքին չեն:
Իսկ ինչի՞ են նրանք հեռացել, գուցե դո՞ւք եք մեղավոր:
Հոգնել են, կամ չեն հավատացել, գուցե լավատեսությո՞ւնն է պակասել:
Ի՞նչը կարող է ձեզ հուսահատեցնել:
Ընկերոջ դավաճանությունը:
Շա՞տ են ձեզ դավաճանել:
Բավականին:
Իսկ դո՞ւք:
Ես` երբեք, դա իմ առավելությունն է: Ես քսանհինգ տարի է՝ քաղաքականության մեջ եմ, ոչ փոխել եմ գաղափարներս, ոչ շրջապատս, ոչ սկզբունքներս: իմ գործունեության առումով ոչինչ իմ մոտ չի փոխվել:
Ի՞նչն է ձեզ զարմացնում եւ զայրացնում:
Ինձ միշտ զարմացնում է բնությունը, եւ զայրացնում մարդու բնությունից հեռանալը, ասֆալտայնացումը:
Զայրութը ինչպե՞ս եք արտահայտում:
Ինքնատիրապետումը ամենաճիշտն է:
Ի՞նչ կցանկանայիք ունենալ, որ չունեք:
Չկա այդպիսի բան, ես ինչ էլ ցանկանայի, կունենայի, երբեք ունենալու ցանկությունը ինձ չի տիրել:
Ամենաթանկարժեք իրը, որ ունեք եւ արժեք (հեռսխոս, մեքենա, բնակարան,, հուշանվեր եւ այլն)
Հարցը շատ նյութական է, ինձ չհետաքրքրող:
Հպարտությունը:
Որ հայ եմ, հայաստանցի եւ ակտիվ քաղաքացի:
Իսկ ովքե՞ր են ոչ հայաստանցիները, օրինակ՝ ղարաբաղացիները հայաստանցի չե՞ն:
Ինձ համար մարդը շատ ավելի բարձր արժեք է, քան ազգությունը, կրոնը կամ որեւէ երկրի քաղաքացի լինելը: Ես հումանիստ եմ: Ղարաբաղցիների նկատմամբ որեւէ բան չունեմ:
Հոգսեր:
Լիքը, դրանց մասին չարժե խոսել:
Պարտականություններ:
Փառք Աստծո, շատ:
Անպատասխանատու արարք կամ հայտարարություն:
Աշխատում եմ քիչ, բայց լրիվ խուսափել անհնար է:
Մոլախաղերում ամենաշատը ինչքա՞ն գումար եք պարտվել եւ հաղթել:
Ափսոսում եմ, երբեք չեմ փորձել, այդ զգացողությունը չեմ ապրել:
Ամենառոմանտիկ օրը:
Կասեի՝ ամենասիրելի, պատմական օրը, անկախության հռչակագրի օրը:
Ամենախենթ քայլերը:
Փառք աստծո, շատ են, միշտ սիրել եմ խենթություններ: Օրինակ` ինձ համար բացարձակ խնդիր չէ թեկուզ մարդաշատ վայրերում շորերով թռչել ջրավազան:
Ընտանիքը:
Իմ հենարանը: Երեխաներս` համախոհներ եւ ընդդիմախոսներ, կինս՝ լրջագույն օպոզիցիա:
Երեխաներ:
Երկու երեխաներս ունեն մեկ առավելություն, դաստիարակվել են լրիվ ազատ, իմ միակ խնդիրը եղել է ազատ դաստիրակելը, դա նշանակում է ընդհանրապես չդաստիրակել: Ունեմ անկախ, ակտիվ երկու քաղաքացիներ: Իրենք իրենց մոտեցումներում ավելի համարձակ են, ռադիկալ, ես հիմա ավելի պահպանողական եմ, զուսպ, այդ հողի վրա մենք երբեմն ունենում ենք քաղաքական տարաձայնություններ:Բայց իրար դիրքորոշումներ ընդունում ենք այնպես, ինչպես կան:
Կանայք: Կսահմանեիք` ո՞վ է կինը:
Ամենադժվար հարցն է: Լավագույն ընկեր, կանայք թեմա են՝ անընդհատ ստեղծագործելու եւ մտածելու համար:
Անցած սերեր:
Սովորաբար, լուրջ տղամարդիկ այս հարցին չեն պատասխանի:
Ինչի՞, կանայք կարդո՞ւմ են այս հարցազրույցները:
Այն, ինչը մի հոգու է, չի կարելի հանրայնացնել:
Ձեր ընտրյալը` կինը, ինչպես եք հանդիպել նրան:
Մարդ, որին հավատում ես եւ վստահում: Աստծո կամոք հանդիպել եմ:
Ի՞նչ խենթ քայլե՞ր եք արել նրա համար, ինչպե՞ս եք համոզել, որ ամուսնա ձեզ հետ:
Համոզելու խնդիր չի եղել,մնացածը չեմ ասի:
Առաջին սիրո խոստովանությունը:
Սերը խոստովանության կարիք չունի եւ խոսքով չի արտահայտում:
-Այսինքն, դարերից եկող «ես քեզ սիրում եմ»-ը լրիվ անիմա՞ստ է:
Իհարկե, կինոնների մեջ ինձ համար ամենատհաճ պահը դա է, երբ սեր են խոստովանում միմյանց:
-Ինչի՞ մասին եք այս պահին մտածում:
Կիրակի օրը ծառ ու թփին հասնելու մասին:
Խոհանոցում ի՞նչ հմտություններ ունեք եւ որքանով եք կիրառում:
Ուտելու մեծ վարպետ եմ, ոչ պատրաստելու, կինս այդ գործը ինձնից լավ է անում:
Խմիչքի հետ «ո՞նց եք»:
Հաճելի ընկերներ ենք, հաճախ բարեւում ենք իրար:
Եթե ոսկե ձկնիկ բռնեիք, ի՞նչ կխնդրեիք նրանից:
Կասեի` իջի ջրի հատակը:
Լինում է, չի լինում
Մի համեստ տղա՝ անունը Արամ:
Երկնքից երեք խնձոր է ընկնում:
Կբաժանեի հազարավոր մասերի, ինչպես ժամանակին մի հոգի ձուկն էր բաժանում:
Ի՞նչ կցանկանայիք ավելացնել ձեր մասին կամ հարցնել ինքներդ ձեզ:
Դու գո՞հ ես քեզնից: Պատասխանը՝ դժգոհ չեմ:
Այժմ ձեր հարցը շարքին մասնկացող հաջորդ պատգամավորին:
Պատգամավորական գործունեության համար մածուն կուզե՞ք:
Նշենք, որ Արամ Մանուկյանը մասնագիտությամբ ֆիզիկոս, է, մանկավարժ: Աշխատել է որպես մանկավարժ, ճարտարագետ, Մշակույթի եւ սպորտի նախարարի տեղակալ, պատգամավոր է ընտրվել դեռեւս 1990թ: ՀՀՇ վարչության նախագահն է:
Ավելի վաղ NEWS.am-ը ներկայացրել էր հարցազրույց ԱԺ ՀՀԿ խմբակցության պատգամավոր Արփինե Հովհաննիսյանի, Լեւոն Մարտիրոսյանի, Նաիրա Կարապետյանի, Հայկ Գրիգորյանի, Մարգարիտ Եսայանի, Գարեգին Նուշիկյանի, Հովհաննես Սահակյանի, Արտակ Զաքարյանի, Կարինե Աճեմյանի, Արտակ Դավթյանի, Սամվել Ֆարմանյանի, Շիրակ Թորոսյանի, Հայկ Բաբուխանյանի, Սուքիաս Ավետիսյանի, Կարեն Ավագյանի, Էդուարդ Շարմազանովի, Տաճատ Վարդապետյանի, Սամվել Նիկոյանի, ՕԵԿ-ից` Հեղինե Բիշարյանի, Կարեն Բոթոյանի. ԲՀԿ-ից` Տիգրան Ուրիխանյանի, Էլինար Վարդանյանի, Վահե Էնֆիաջյանի, Նաիրա Զոհրաբյանի, Գուրգեն Արսենյանի, Վահան Բաբայանի, Արմեն Ավետիսյանի, Միքայել Մելքումյանի, ՀԱԿ-ից Լյուդմիլա Սարգսյանի, Հրանտ Բագրատյանի, Գագիկ Ջհանգիրյանի «Ժառանգությունից»` Ռուբեն Հակոբյանի, Խաչատուր Քոքոբելյանի,Ալեքսանդր Արզումանյանի, ՀՅԴ-ից` Արծվիկ Մինասյանի, Աղվան Վարդանյանի, անկախ պատգամավոր Էդմոն Մարուքյանիհետ:
Շարքը` Ինգա Մարտինյանի