Սպառազինությունների մրցավազքը, որ նախաձեռնել է Ադրբեջանը, լուրջ սպառնալիք է տարածաշրջանի համար: Այս մասին հայտարարել է ՆԱՏՕ-ի Խորհրդարանական վեհաժողովում հայկական պատվիրակության ղեկավար Կորյուն Նահապետյանը, ով Բաքվում մասնակցում է Վեհաժողովի սեմինարին: Նա հայտարարել է, որ վերջին 7 տարիների ընթացքում Ադրբեջանի ռազմական բյուջեն մեծացել է 20 անգամ եւ փորձել է այդ ներկայացրել որպես իրական սպառնալիք տարածաշրջանի համար: Նա այդ կապակցությամբ կառույցից կոշտ արձագանք է պահանջել:
ԱՊԱ գործակալության փոխանցմամբ, Կորյուն Նահապետյանից հետո ելույթ ունեցած հայ պատգամավոր Թեւան Պողոսյանն էլ Ադրբեջանին մեղադրել է ղարաբաղյան հակամարտությունը սկսելու համար: Նա հայտարարել է, որ ԽՍՀՄ փլուզման նախաշեմին Ադրբեջանում մեծ քանակությամբ զենք ու զինամթերք էր մնացել, եւ պաշտոնական Բաքուն, օգտվելով դրանից, սկսել է սպառնալ Ադրբեջանում բնակվող հայերին:
Այս հայտարարությունները, բնականաբար, դուր չեն եկել ադրբեջանական կողմին: ՆԱՏՕ-ի ԽՎ-ում Ադրբեջանի պատվիրակության ղեկավար, Միլի Մեջլիսի նախագահի առաջին տեղակալ Զիաֆաթ Ասքերովը հայտարարել է, որ Հայաստանի պատվիրակությունը երկու օր շարունակ «Բաքվում սադրանքով է զբաղվում»: Ավանդույթի համաձայն, հիշելով «գրավալ տարածքների» եւ «միլիոնավոր փախստականների մասին»՝ ադրբեջանցի պատգամավորը նաեւ հայտարարել է, թե «ահաբեկչությունը Հայաստանում պետական քաղաքականություն է, իսկ երկրի ղեկավար Սերժ Սարգսյանը տարածաշրջանի թիվ մեկ ահաբեկիչն է»:
