Կարեն Դեմիրճյանի անվան Մետրոպոլիտենի «Բարեկամություն» կայարանում օգոստոսի 19-ին ժամը 18:00-ի սահմաններում շարժասանդուղքի տակ ընկած 2 տարեկան աղջնակի վիրահատությունը հաջող է անցել, հետեւանքների մասին էլ դեռ վաղ է խոսելը: Այս մասին NEWS.am-ին ասաց թիվ 3 մանկական հիվանդանոցի տնօրեն, մանկական վիրաբույժ Նիկոլայ Դալլաքյանը:
«Երեխայի սրունքն է վնասվել, վիրահատել են, ոտքը պահպանվել է, բարեհաջող ընթացք ունի հետվիրահատական շրջանը: Իհարկե, ցանկացած վիրահատություն կարող է բարդություն ունենալ, հետեւաբար, հետեւանքների մասին դեռ վաղ է խոսելը: Ամեն դեպքում դրական դինամիկա կա»,- ասաց բժիշկը:
Նշենք, որ դեպքը տեղի է ունեցել երեկոյան ժամը 18:00-ի սահմաններում: Ականատեսների խոսքով՝ մայրը երկու երեխաների հետ շարժասանդուղքով հանգիստ իջնելիս է եղել, երբ երեխայի ոտքը մնացել է շարժասանդուղքի տակ:
«Աննկարագրելի եւ անբացատրելի էր, չենք հասկանում, թե ոնց եղավ, երեւի երեխան պահի տակ ոտքն է շարժել»,- NEWS.am-ին պատմել էր ականատեսներից մեկը:
