Մենք ավանդաբար երեխապաշտ ազգ ենք: Այդ մասին NEWS.am-ի թղթակցի հետ զրույցում նշել է ԲՀԿ նախագահ, ԱԺ պատգամավոր Նաիրա Զոհրաբյանը:
«Երեխաները մեր ամենամեծ արժեքն են, բայց, ցավոք սրտի, մենք ունենք սոցիալապես անապահով երեխաներ, որոնց ես կուզեի տեսնել այսօր այստեղ, քանի որ իրենք հաճախ զրկված են տարական համերգ գնալու կամ պաղպաղակ գնելու հնարավորությունից: Այդ հանգամանքը պետք է բոլորիս մտահոգության պատճառը դառնա»,- նշեց Նաիրա Զոհրաբյանը:
Նա պատմեց, որ շատ երջանիկ մանկություն է ունեցել: «Իսկ ամենաշատը տպավորվել է, թե ինչպես ես եւ երեք քույրերս ծնողներիս հետ մեր կապույտ ժիգուլիով գնացինք ծով՝ Գելենջիկ: Ես այդ ժամանակ չորս տարեկան էի: Եւ երբ տեսա ծովն ասեցի, վայ, այս ինչ մեծ ջուր է: Եւ այդ օրվանից ծովն իմ տարերքն է ու հիացմունքի պատճառը»,- ասաց Նաիրա Զոհրաբյանը:
Նշենք, որ Երեւանի Հյուսիսային պողոտայում ընթանում է NEWS.am-ի ամենամյա բարեգործական ակցիան:
Օրվա ընթացքում վաճառված պաղպաղակից գոյացած հասույթն ամբողջությամբ կփոխանցվի Հայաստանի սահմանամերձ Դարանակ եւ Փամբակ գյուղերի (հայ-ադրբեջանական սահման, Գեղարքունիքի մարզ) դպրոցահասակ անապահով երեխաներին։
Բարեգործական ակցիային աջակցել են «Թամարա», «Երեւան Կաթ» , «Կոկա-Կոլա», «Happyk» ընկերությունները, «Երազանք» թատերախումբը, Երեւանի պատանի հանդիսատեսի թատրոնը, Երեւանի Կենտրոն վարչական շրջանի թաղապետարանը:
Հիշեցնենք, որ NEWS.am լրատվական-վերլուծական գործակալությունը երեխաների միջազգային օրվա կապակցությամբ ամեն տարի կազմակերպում է բարեգործական ակցիա, որից ստացված ամբողջ հասույթը փոխանցվում է կարիքավոր երեխաներին:
Լուսանկարները՝ Արսեն Սարգսյանի/NEWS.am