Արմեն Ալքամյանը, որը հայտնի է որպես DJ Smoke, ցանկանում է, որ աշխարհում մանկատներ եւ մանկական հիվանդանոցներ չլինեն։ NEWS.am-ի հետ զրույցում երաժիշտը Երեխաների պաշտպանության օրվա կապակցությամբ շնորհավորեց բոլոր երեխաներին՝ ցանկանալով նրան անհոգ ու երջանիկ մանկություն (ֆոտոռեպորտաժ):
«Ուզում եմ, որ աշխարհի բոլոր մանուկները կյանքում չտխրեն: Աշխարհում ինչքան բալիկներ կան, թող բոլորն ապրեն ուրախ, անհոգ ու երջանիկ, երեխաները քաղցր ցեց են, ես իրենց ցավը տանեմ»,- ասաց DJ Smoke-ը:
Երաժիշտը պատմեց, որ իր մանկությունը շատ գունեղ է եղել, երգ ու պարով լի, միշտ շրջապատված է եղել «բարի ու քաղցր մարդկանցով»: Նրա խոսքով՝ փոքր տարիքում քաղցրակեր է եղել եւ գողացել է տան քաղցրավենիքը, սակայն իրեն դրա համար չեն պատժել:
«Շատ եմ սիրել քաղցրեղեն՝ սկսած կրծքի կաթից, վերջացրած՝ տան թանկանոց բամբաներկեքից, որը պետք է տանեին հարսանիքի, բայց ես բացում, ուտում էի, ու քանի որ փոքր էի, ինձ ոչ ոք ոչ մի բան չէր կարող ասել»,- ժպիտով հիշեց երաժիշտը:
DJ Smoke-ը ցանկանում է, որ իր արդեն 1-ամյա զավակը՝ Դանիելը, դառնա լավ երաժիշտ եւ մնա Հայաստանոմ եւ շենացնի իր երկիրը։
«Թող ինքը լինի առաջինը լավ մարդ, երկրոդը՝ քրիստոնյա հայ: Ուզում եմ, որ իմ տղան լինի լավ երաժիշտ: Հիմիկվանից նրա մեջ սերմանում եմ լավ երաժշտություն, եւ զարմանալին այն է, որ մեկ տարեկան փոքրիկն արդեն հասկանում է երաժշտության լավն ու վատը, արդեն ընկալում է այդ ամենը։ Ուզում եմ, որ հայրենասեր տղա լինի: Իր ծնունդով շատ բաներ եմ պլանավորել, բայց թող մեծանա, դառնա չափահաս եւ ինքը որոշի` ինչ է ուզում դառնալ, ես էլ կփորձեմ օգնել: Բայց ուզում եմ, որ դառնա արժանավոր երեւանցի, որովհետեւ երեւանցի չի մնացել, մի պադյեզդ մարդ ենք մնացել, թող ինքը էդ մի պադյեզդը սարքի մի շենք, մի թաղամաս, մի ամբողջ հանրապետություն իրենով: Ու իր նման երեխաները թող մեծանան եւ շենացնեն մեր քաղաքն ու մեր երկիրը ու այս երկրից ոչ մի տեղ չգնան»,- ասաց նա:
DJ Smoke-ը նաեւ նշեց, որ Հայաստանում երեխաների իրավունքները, ըստ երեխաների վերաբերյալ իր կարդացած տեղեկությունների, 70-80 տոկոսով պաշտպանված են։
Նշենք, որ երեկ՝ մայիսի 31-ին, DJ Smoke-ը ի թիվս այլ հայտնիների մասնակցում էր Երեխաների պաշտպանության օրվան նվիրված NEWS.am-ի ամենամյա բարեգործական ակցիային:
Բարեգործական ակցիայի այս տարվա հասույթն (1 մլն 225 հազար դրամ եւ 6900 ԱՄՆ դոլար) ամբողջությամբ կփոխանցվի Հայաստանի սահմանամերձ Դարանակ եւ Փամբակ գյուղերի (հայ-ադրբեջանական սահման, Գեղարքունիքի մարզ) դպրոցահասակ անապահով երեխաներին:
Հիշեցնենք, որ NEWS.am լրատվական-վերլուծական գործակալությունը երեխաների միջազգային օրվա կապակցությամբ ամեն տարի կազմակերպում է բարեգործական ակցիա, որից ստացված ամբողջ հասույթը փոխանցվում է կարիքավոր երեխաներին: