ԱԺ նախկին պատգամավոր Հակոբ Հակոբյանի (Ճոյտ) որդին՝ Արմեն Հակոբյանը ժամանակավոր դուրս է գրվել, որպեսզի մասնակցի հորեղբոր թաղմանը: Այս մասին NEWS.am-ի թղթակցի հետ զրույցում ասաց «Այրվածքաբանության կենտրոնի» ղեկավար Նորայր Դավիդյանը:
Նա նշեց, որ Արմեն Հակոբյանի վիճակը կայուն է, բայց ունի շատ խորը վերքեր, վնասվածքներ, որոնք հենց այնպես չեն անցի, պետք է վիրահատեն: Նորայր Դավիդյանն ասաց, որ Արմեն Հակոբյանը ժամանակավոր դուրս է գրվել հիվանդանոցից, որպեսզի մասնակցի հորեղբոր թաղմանը, բայց ամեն օր գալիս է, ամբուլատոր բուժօգնություն ստանում եւ հեռանում: Իսկ հուղարակավորությունից հետո նա դեռ պետք է պառկի հիվանդանոցում, լիովին ապաքինվի եւ վիրահատվի: Ի դեպ, դեռ հիվանդանոցում է գտնվում նաեւ Հակոբ Հակոբյանի լցակայանի աշխատակիցը՝ Արթուր Գասպարյանը:
Ավելի վաղ հայտնել էինք, որ Արմավիրի մարզի Զվարթնոց գյուղի գազալցակայաններից մեկում մայիսի 25-ի առավոտյան, պայթյուն է տեղի ունեցել, ինչի հետեւանքով 3 մարդ վիրավորվել է: Պայթյունը նախնական տվյալներով առաջացել է կոմպրեսորային կայանից,, որի հետեւանքով պայթել է Volkswagen մակնիշի 34 QF 306 համարանիշի ավտոմեքենան: Մեքենան պատկանում է նախկին ԱԺ պատգամավոր Հակոբ Հակոբյանի (Ճոյտ) հարազատներին կիսով չափ այրվել է: Պայթյունի հետեւանքով վիրավորվել են մեքենայի կողքին գտնվող Հակոբ Հակոբյանի եղբայրը եւ որդին, ինչպես նաեւ գազալցակայանի աշխատողը:
Նշենք, որ գազալցակայանը, ըստ մեր տեղեկությունների, պատկանում Հակոբ Հակոբյանին, այն 2-3 տարի է՝ փորձաքննություն չի անցել եւ վերջին անգամ՝ մոտ 2 շաբաթ առաջ տուգանվել է 1մլն դրամի չափով: Վիրավորներին տեղափոխել էին «Վաղարշապատի» ԲԿ, որտեղից էլ Երեւան: Երեկ մահացել է Հակոբ Հակոբյանի եղբայրը՝ Արմեն Հակոբյանը:
