Գյումրիում տեղի ունեցած սարսափելի վթարի գործով երեկ՝ հուլիսի 10-ին, կայացած նիստը հետաձգվել է, քանի որ ԱԺ պատգամավոր Մարտուն Գրիգորյանի «Տրանս ակնթարթ» ընկերության աշխատակիցները չէին եկել նիստին: Այս մասին NEWS.am-ի թղթակցի հետ զրույցում ասաց գործով ամբաստանյալ Մանվել Վարդանյանի փաստաբանը՝ Լիանա Բալյանը: Նա շեշտեց, որ պատգամավորի «Տրանս ակնթարթ» ընկերության տնօրենը Անահիտ Խալաթյանը եւ տեխնիկական վիճակի համար պատասխանատու մեխանիկը դիտավորյալ չեն գալիս նիստերին, քանի որ այնտեղ բազում հարցերի են ստիպված լինելու պատասխանել՝ կապված «Գազելի» անսարքության, բալոններիի տեղադրման, անվտանգության մասին:
Լիանա Բալյանն ասաց, որ մայիսի 14-ից հետո, երբ դատարանում միջադեպ եղավ եւ հակառակ կողմի ներկայացուցիչները հարձակվել էին իր վրա, դրանից հետո նրանք սկսել են նիստերին չգալ: ԱԺ ԲՀԿ-ական պատգամավոր Մարտուն Գրիգորյանի «Տրանս ակնթարթ» ընկերության տնօրեն Անահիտ Խալաթյանը դատարանին դիմում է ներկայացրել, թե իբր հիվանդ է, անաշխատունակ: Դատական նիստերին չի գալիս նաեւ ընկերության մեխանիկը՝ գործով վկա Արթուր Ասատրյանը: Թեեւ դատարանը նրանց բերման ենթարկելու որոշում է կայացրել, սակայն երեկ կայացած նիստին եւս նրանք չկային: Հաջորդ նիստը նշանակված է հուլիսի 16-ին, փաստաբանը հույս ունի, որ այս անգամ դատարանին կհաջողվի նրանց բերման ենթարկել:
Ինչպես ավելի վաղ հաղորդել էր NEWS.am-ը, 2014թ. նոյեմբերի 10-ի երեկոյան՝ ժամը 19։15-ի սահմաններում, խոշոր ավտովթար է տեղի ունեցել Շիրակի մարզում. Երեւան-Գյումրի ավտոճանապարհի` Հոռոմ գյուղի խաչմերուկում մարդատար «Գազել» մակնիշի ավտոմեքենան բախվել է «Կամազ» մակնիշի բեռնատարին, ինչի հետեւանքով «Գազելը» պայթել է։ Նախնական տեղեկություններով՝ վթարի պահին «Գազելի» մեջ եղել է 14 ուղեւոր, որոնցից 7-ը տեղում մահացել են, իսկ 7-ը՝ տեղափոխվել բժշկական կենտրոն։ Փաստի առթիվ Շիրակի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի՝ 242-րդ հոդվածի 3-րդ մասի հատկանիշներով։ «Գազելին» բախված «Կամազ» մակնիշի բեռնատարի վարորդը՝ Մ.Վարդանյանը, կալանավորված է: Ընթանում է դատաքննություն: