Գյումրիում տեղի ունեցած սարսափելի վթարի գործով միջնորդել են համալիր փորձաքննություններ նշանակել:
Այս մասին NEWS.am-ի թղթակցի հետ զրույցում ասաց գործով ամբաստանյալ Մանվել Վարդանյանի փաստաբանը՝ Լիանա Բալյանը:
Ուրբաթ օրը կայանալիք նիստին պարզ կլինի՝ փորձաքննություն կարվի, թե ոչ, իսկ դրա արդյունքում կպարզվեն մի շարք հանգամանքներ, օրինակ՝ գազի բալոնները որտեղից է ձեռք բերվել, փորձարկում անցել է, թե ոչ եւ այլն:
Փաստաբանն ասաց, որ ԱԺ պատգամավոր Մարտուն Գրիգորյանին պատկանող, «Տրանս ակնթարթ» ընկերության մեխանիկ Ասատուր Ասատրյանը նախաքննության ընթացքում ցուցմունք է տվել, որ «Գազել» մեքենան գտնվել է ամբողջովին սարքին վիճակում, իսկ երբ հերթը հասել է դատարանում վկայություն տալուն, պարզվել է, որ նրան ազատել են են աշխատանքից եւ ՀՀ-ում չէ: «Փորձաքննությամբ ապացուցված է, որ «Գազելի» անվադողերը եղել են մաշված, արգելակները, կախոցները, ղեկը՝ անսարք, «Գազելը» տեղափոխել է քանակից ավելի ուղեւորներ, իսկ գազաբալոնների կափույրները ունեցել են դեֆորմացիա, «Գազել» ավտոմոբիլը նախատեսված է եղել բենզինով վարելու համար, սակայն հետագայում տեղադրվել են անհայտ ծագումի գազաբալոններ, որոնք փորձարկում չեն էլ անցել»,-ասաց Լիանա Բալյանը:
Փաստաբանն ասաց նաեւ, որ օրերս կայացած դատական նիստին հերթական միջադեպն է եղել: Նիստի ժամանակ վթարի հետեւանքով մահացած Հովհաննես Շիրազի տուն-թանգարանի հիմնադիրներից Արամայիս Շիրազունու որդին՝ Գուրգեն Թումանյանը հայտարարել է, որ ինքը լսել է, որ «Գազելի» վարորդը օրվա երկրորդ կեսին խմած է եղել եւ պահանջել է արտաշիրում անել: Սա վրդովեցրել է «Գազելի» վարորդի դստերը, նրանք դատարանում վիճաբանել են եւ վիրավորել միմյանց: «Տրանս ակնթարթ» ընկերության ներկայացուցիչ Անահիտ Խալաթյանն էլ նշել է, որ Գյումրիում գիծ դուրս գալուց առաջ վարորդներին ստուգում են խմածության համար, սակայն Երեւանում ՝ Գյումրիի վերադառնալիս, բուժկետ չունեն եւ չեն ստուգում: Լիանա Բալյանի խոսքով՝ Անահիտ Խալաթյանը նաեւ նշել է, որ իր աշխատանքն է՝ որոշել մեքենան տեխնիկապես սարքին է եւ գիծ դուրս գալիս է, թե ոչ, իսկ թե ինչպես է նա դա որոշում, ընկերության ներկայացուցիչն ասաց, որ մեխանիկի խոսքերի հիման վրա, քանի որ ինքը անձնապես մեքենաներից չի հասկանում:
Ինչպես ավելի վաղ հաղորդել էր NEWS.am-ը, 2014թ. նոյեմբերի 10-ի երեկոյան՝ ժամը 19։15-ի սահմաններում, խոշոր ավտովթար է տեղի ունեցել Շիրակի մարզում. Երեւան-Գյումրի ավտոճանապարհի` Հոռոմ գյուղի խաչմերուկում մարդատար «Գազել» մակնիշի ավտոմեքենան բախվել է «Կամազ» մակնիշի բեռնատարին, ինչի հետեւանքով «Գազելը» պայթել է։ Նախնական տեղեկություններով՝ վթարի պահին «Գազելի» մեջ եղել է 14 ուղեւոր, որոնցից 7-ը տեղում մահացել են, իսկ 7-ը՝ տեղափոխվել բժշկական կենտրոն։ Փաստի առթիվ Շիրակի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի՝ 242-րդ հոդվածի 3-րդ մասի հատկանիշներով։ «Գազելին» բախված «Կամազ» մակնիշի բեռնատարի վարորդը՝ Մ.Վարդանյանը, կալանավորված է: