7 մարդու մահվան պատճառ դարձած՝ Գյումրիի վթարի գործով մեղադրվող, բեռնատարի վարորդ Մանվել Վարդանյանը դատապարտվել է 8 տարվա ազատազրկման: Շիրակի մարզի առաջին ատյանի դատարանը վճիռը հրապարակել է այսօր՝ օգոստոսի 11-ին: Դատախազը Մանվել Վարդանյանի համար պահանջել էր 9 տարվա ազատազրկում:
Հիշեցնենք, որ 2014թ նոյեմբերի 10-ին, «Իմէքս -Գրուպ» ՍՊԸ-ի վարորդ, 45-ամյա Մ.Վարդանյանն «Կամազ-53202» մակնիշի բեռնատար ավտոմեքենայով բախվել էր թիվ 359 «Գազ-32213» մակնիշի ուղևորատար ավտոմեքենային: Վթարի հետևանքով ուղևորատար մեքենան հրդեհվել էր, 7 հոգի մահացել էր, 8-ը՝ տարբեր մարմնական վնասվածքներով տեղափոխվել հիվանդանոց:
Մ.Վարդանյանին մեղադրանք է առաջադրվել ՀՀ ՔՕ 242-րդ հոդվածի 3-րդ մասով՝ ավտոմեքենան վարողի կողմից ճանապարհային երթևեկության կամ տրանսպորտային միջոցների շահագործման կանոնները խախտելը, որը մարդու առողջությանն անզգուշությամբ պատճառել է ծանր կամ միջին ծանրության վնաս: