Հայ զինծառայողների նկատմամբ բոլոր վայրագությունները կփաստաթղթավորվեն իրավասու մարմինների կողմից եւ կներկայացվեն միջազգային հանրությանը։ Այս մասին NEWS.am-ի թղթակցի հետ զրույցում ասել է ԼՂՀ օմբուդսմեն Յուրի Հայրապետյանը։
Ավելի վաղ ԼՂՀ պատանդների, ռազմագերիների եւ անհետ կորածների հարցերով պետական հանձնաժողովը հայտնել էր, որ նախօրեին Ադրբեջանի կողմից հանձնված հայ զինծառայողների մարմինների մեծ մասը խեղված եւ անարգված է։
Լեռնային Ղարաբաղի դեմ Ադրբեջանի նախաձեռնած ագրեսիան ուղեկցվել է Ժնեւի կոնվենցիաների եւ Միջազգային հումանիտար իրավունքի բազմաթիվ խախտումներով։ Հրետակոծության հետեւանքով զոհվել էր 12-ամյա Վաղինակ Գրիգորյանը, եւս երեք երեխա վիրավորվել է։
Ադրբեջանցի զինվորները գործել են ահաբեկչական կազմակերպությունների, որոշ տեղեկություններով՝ գործել են նաեւ ԻՊ վարձկաններ։
Ներխուժելով Թալիշ գյուղ՝ ադրբեջանցի զինվորականները դաժանորեն սպանել էին տարեց մարդկանց։ Վալերա Խաչատրյանն ու նրա կինը՝ Ռազմելանն, ինչպես նաեւ 92-ամյա Մարուսյա Խալաֆյանը սպանվել էին։ Իսկ վայրագները կտրել էին նրանց ականջները։
Կան նաեւ հայ զինծառայողներին անդամահատելու մի շարք փաստեր։ Բարբարոսները կտրել էին գլուխները եւ ձեռքերը, լուսանկարվել «ավարի» հետ եւլուսանկարները տեղադրել համացանցում։
Ավելի վաղ համաշխարհային մամուլը հայտնել էր ԻՊ գրոհայիններին ղարաբաղյան հակամարտության գոտի տեղափոխելու մասին։
Ռուսաստանի հատուկ ծառայությունների տեղեկություններով՝ Ադրբեջանը ԻՊ-ին ֆինանսավորելու առումով ԱՊՀ-ում երկրորդ տեղում է գտնվում։
