«Իսլամական պետություն» ահաբեկչական խմբավորման ադրբեջանական ջոկատը՝ 50-ից 70 հոգանոց կազմով, լքել է Սիրիայի Ռաքքա քաղաքը, հայտնում է ռազմական աղբյուրը: Հաղորդվում է, որ ծայրահեղականները Թուրքիայի տարածքով վերադարձել են Ադրբեջան՝ մասնակցելու ղարաբաղյան հակամարտության գոտու մարտական գործողություններին, հաղորդում է Lifenews-ը Սիրիայից:
Այդ կապակցությամբ Սիրիայում «ահաբեկիչների վարչական մայրաքաղաքում» իսկական սկանդալ է ծագել, ԻՊ գրոհայինները ցավոտ են ընդունում կարգապահական խախտումները, հատկապես սիրիական բանակի վերջին հաջողությունների ֆոնին:
Հարկ է նշել, որ Ադրբեջանից եկած ահաբեկիչներին նախկինում էլ ԻՊ շարքերում մեղադրել են դավաճանության մեջ: Այսպես, 2015թ. հունվարին գրոհայինները մահապատժի էին ենթարկել դաշտային հրամանատար Սիրաջ Ազերիին՝ նրան կասկածելով լրտեսության մեջ:
Սիրիայում հակամարտության ողջ ընթացքում սպանվել է Ադրբեջանի 100-ից ավելի քաղաքացի, նման վիճակագրություն տարածել են այդ երկրի պաշտոնական լրատվամիջոցները: Իրականում, այդ թիվը կարող է ավելին լինել: