Գիտնականները չափերով եւ ջերմաստիճանով Վեներային եւ Երկրին նման երեք մոլորակ են հայտնաբերել:
In Space-ի փոխանցմամբ, Բելգիայի Լիեժի համալսարանից Միքայել Գիլոնն աստղագետների խմբի հետ TRAPPIST աստղադիտակի օգնությամբ հետեւել է 2MASS J23062928-0502285 աստղին, որը հայտնի է նաեւ TRAPPIST-1 անունով: Մասնագետները հայտնաբերել են, որ այդ սառը եւ խամրած աստղը ժամանակ առ ժամանակ փոքր-ինչ «գունաթափվում» է, ինչը մի քանի օբյեկտների տարանցում է մատնանշում: Մանրամասն ուսումնասիրությունը ցույց է տվել, որ աստղի շուրջ երեք մոլորակներ են պտտվում:
Հետազոտությունները ցույց են տվել, որ TRAPPIST-1-ի շուրջ պտտվող այդ մոլորակների պարամետրերը նման են Երկրին: Մոլորակներից երկուսի ուղեծրային պարբերաշրջանները կազմում են, համապատասխանաբար, 1.5 եւ 2.4 օր, իսկ երրորդինը՝ 4.5-ից մինչեւ 70 օր:
«Կարճ ուղեծրային պարբերաշրջաններով մոլորակները 20 եւ 100 անգամ ավելի մոտ են իրենց աստղին, քան Երկիրը՝ Արեգակին: Մոլորակային այս համակարգի կառուցվածքը ծավալով ավելի նման է Յուպիտերի արբանյակների համակարգին, քան Արեգակնային համակարգին»,- պարզաբանել է Միքայել Գիլոնը: