«Հայ ազգային կոնգրես» խմբակցությունը կողմ կքվեարկի Ընտրական օրենսգրքում փոփոխությունների նախագծին, եթե համոզվի, որ այն լրիվ համապատասխանում է ձեռք բերված համաձայնությանը։ Այս մասին այսօր՝ հունիսի 27-ին, ԱԺ-ում ասաց խմբակցության ղեկավար Լեւոն Զուրաբյանը՝ պնդելով, որ իշխանության հետ կոնսենսուս չկա:
«Մենք այս պահին, սակայն, նման մտադրություն չունենք, քանի որ միայն այսօր առավոտյան է Դավիթ Հարությունյանը մեր խմբակցություն եկել եւ մենք հասցրել ենք ընդամենը մի քանի դրույթ քննարկել»,- ասաց Լեւոն Զուրաբյանը։
Խմբակցության ղեկավարը մեկ անգամ եւս ընդգծեց, որ սա կոնսենսուս չէ, պարզապես մի քանի դրույթների վերաբերյալ համաձայնություն է ձեռք բերվել։
Նշենք, որ Ընտրական օրենսգրքում փոփոխվում են այն դրույթները, որոնց վերաբերյալ ՀԱԿ-ը պահանջներ էր ներկայացրել իշխանությանը։ Հունիսի կեսերին վերսկսված 4+4+4 ձեւաչափով քննարկման ժամանակ իշխանությունը ներկայացրել էր կատարված փոփոխությունները։ Ըստ դրանց՝ ՀԱԿ-ի հինգ պահանջներից 4-ը ընդունվել էր, ինչի շուրջ կողմերը եկել են կոնսենսուսի։
Ըստ ձեւակերպման՝ ոչ թե Ընտրական օրենսգրքի շուրջ են կողմերը եկել կոնսենսուսի, այլ վերահսկողական մեխանիզմների։ Նախկինում հայտարարվել էր, որ եթե կողմերը այս փոփոխությունների շուրջ կոնսենսուսի գան, արտահերթ նիստով դրանք ընդգրկվելու են Ընտրական օրենսգրքում։
Հիշեցնենք, որ այս կոնսենսուսը միտված էր միջազգային կառույցներից վերահսկողական մեխանիզմների գործադրման համար ֆինանսական աջակցություն ստանալուն։ Սակայն հիմա պարզվում է՝ նախկինում շրջանառված 15 միլիոն դոլարից 10 միլիոնն են տրամադրելու, իսկ իշխանությունը չի պատրաստվում բացը լրացնել։